ოზურგეთის მუნიციპალიტეტის სოფელ ნასაკირალში განვითარებულ მოვლენებს ახმაურება „ერთიანი ნაციონალური მოძრაობის“ ერთ-ერთი ლიდერი ნიკა მელია და აცხადებს, რომ მის თანაპარტიელს, ბესო ქათამაძეს ფიზიკურად ნესტორ რამიშვილი გაუსწორდა.

მელიას ცნობით, ნესტორ რამიშვილი გურიის სამხარეო ადმინისტრაციის თანამშრომელი და კახა კალაძის მეგობარია და ამავე დროს მეზობელიცაა სამტრედიაში და სწორედ ასეთი „პირების მეშვეობით ძალადობს ივანიშვილი და ინარჩუნებს ძალაუფლებას“.

„ეს ვინმე ნესტორ რამიშვილია (ფოტოებზე მონიშნული პირი). ერთ-ერთია, რომელიც ლაჩრულად, ფიზიკურად გაუსწორდა ბესო ქათამაძეს და გუშინ საღამოს მომიქსიეს მე“, წერს მელია „ფეისბუქის“ საკუთარ გვერდზე და განაგრძობს:

„მასზე ყურადღებას არც შევაჩერებდი, სწორედ ასეთ და მხოლოდ ასეთ პირებზე რომ არ იდგეს უკვე მარგინალური და პოლიტიკურად გაბანკროტებული ხელისუფლება.

ამ ფოტოებიდან კარგად ჩანს ვის ინტერესებსაც ემსახურება მოძალადე ნესტორ რამიშვილი.

კარგად ჩანს, ვის გულის მოგებასაც ცდილობს და ვისაც აქვს მასზე ზემოქმედების ბერკეტები.

ცნობისთვის, ნესტორ რამიშვილი გურიის გუბერნიის ‘თანამშრომელია’. მეუღლე ოზურგეთის საკრებულოს წევრია ქართული ოცნებიდან. ნესტორ რამიშვილი კახი კალაძის მეგობარი და მეზობელია სამტრედიაში.

აი, ასეთი პირების მეშვეობით ძალადობს ივანიშვილი და ინარჩუნებს ძალაუფლებას. ასეთ პირებზეღა დგას ეს ხელისუფლება. მას სხვა დასაყრდენი აღარ შერჩა საზოგადოებაში“, წერს ნიკა მელია „ფეისბუქზე“ და მის ამ განცხადებას ფოტომასალასც ურთავს თან.