მამუკა ბახტაძის მიერ წარმოდგენილ წინადადებას, რომ უახლოეს დღეებში მთავრობის დროებითი შემადგენლობა დამტკიცდეს და პარლამენტისთვის ახალი მინისტრთა კაბინეტის წარდგენა სტრუქტურული ცვლილებების შემდეგ მოხდეს, უპრეცედენტოს უწოდებს „ერთიანი ნაციონალური მოძრაობის“ პოლიტიკური საბჭოს თავმჯდომარე ნიკა მელია.

„ის, რაც დღეს ხდება ქართული ოცნების თავს, მანახეთ ერთი სახელმწიფო, სადაც მსგავსი პრეცედენტი მომხდარა. ე.ი. ამტკიცებენ მინისტრებს, რომლებზეც ამბობენ, რომ რეალურად ეს მინისტრები აღარ იქნებიან 2-3 კვირაში. ვერ დალაგდნენ, ვერ გაიგეს რა აკეთონ თავად ხვალ და ზეგ. არ არსებობს გეგმა კონკრეტული და ყოველი დღე მიანიშნებს იმაზე, რომ ქვეყანას ხელისუფლება მიაქანებს უფსკრულისკენ. ამიტომ, საზოგადოება, სამოქალაქო სექტორი, ყველა ღირსეული ოპოზიციური პარტია აუცილებლად უნდა იყოს აქტიური როგორც არასოდეს, რომ რაც შეიძლება სწრაფად ქვეყნის განვითარება დავიწყოთ და ქვეყნის განვითარებას არ ექნება ადგილი, სანამ ქართული ოცნება იქნება სადავეებთან“, განაცხადა ნიკა მელიამ თემის კომენტირებისას „რუსთავი 2“-თან.