ასე სახაჭაპურეც კი არ იმართება, არათუ სახელმწიფო. თუ კიდევ რამე გამიკვირდებოდა ამ დღეებში, ნამდვილად არ მეგონა, ასე აფასებს „შენების მოძრაობის" დამფუძნებელი და თავმჯდომარე დავით უსუფაშვილი პრემიერ მინისტრობის კანდიდატის, მამუკა ბახტაძის წინადადებას, რომ უახლოეს დღეებში მთავრობის დროებითი შემადგენლობა დამტკიცდეს და პარლამენტისთვის ახალი მინისტრთა კაბინეტის წარდგენა სტრუქტურული ცვლილებების შემდეგ მოხდეს.

როგორც უსუფაშვილმა ჟურნალისტებთან საუბრისას განაცხადა, „საჭიროა, სასწრაფოდ, მთავრობას თუ დასახელებულ კანდიდატს პრემიერ მინისტრობის ვინმემ კონსტიტუცია მიაწოდოს და კონსტიტუციას ჩახედონ".

„და ყველა, ვინც ამაზე საუბრობს, ერთხე და სამუდამოდ ჩამოყალიბდნენ იმაში, რომ ეს ქვეყანა იმართება კონსტიტუციით. რას ნიშნავს, ცოტა ხანი დავამტკიცებთ, მერე სხვა რაღაცას გავაკეთებთ და მერე კიდევ დავამტკიცებთ? თუ ის კანონი არ მიიღეს სტრუქტურული ცვლილების ს შეცვლაზე, ან ახალი შემადგნელობა არ წარმოადგინა, ჰაიჰარად დამტკიცებული მთავრობა დარჩეს ქვეყანას? ყოველად წარმოუდგენელია, ხალხო, მე ნამდვილად არ მეგონა, თუ ამ დღეებში კიდევ რამე გამიკვირდებოდა. ახლა იმედი პარლამენტზეა. იქნებ, პარლამენტში მაინც ეყოს ვინმეს ცოდნაც, სახელმწიფოებრივი აზროვნებაც და მიდგომებიც და ახალ პრემიერს თუ პრემიერობის კანდიდატს ამ საწყის ეტაპზევე კარგად განუმარტონ, რა საქმეს კიდებს ეს კაცი ხელს, რა ჩარჩოებში უნდა ჩასვას თავისი თავიც და მთავრობაც და რა შემთხვევაში შეძლებს ქვეყნის ასე თუ ისე გაძღოლას", აცხადებს დავით უსუფაშვილი.