იმ ფონზე, როცა შეერთებულ შტატებსა და ჩინეთს შორის მზარდი სავაჭრო აყალმაყალი გრძელდება, დონალდ ტრამპი იმუქრება, რომ დამატებით 200 მილიარდი აშშ დოლარის ღირებულების ჩინურ პროდუქციაზე დააწესებს ტარიფებს.

მან განაცხადა, რომ 10%-იანი ტარიფები ძალაში შევა, თუკი „ჩინეთი უარს იტყვის მისი დადგენილი წესების შეცვლაზე“.

ტრამპი დაჟინებით ირწმუნება, რომ ჩინეთი აშშ-სთან წლების განმავლობაში არსებული სავაჭრო დისბალანსით უსამართლოდ იღებს სარგებელს.

გასულ კვირას ამერიკის პრეზიდენტმა განაცხადა, რომ ვაშინგტონი 50 მილიარდი აშშ დოლარის ჩინურ საქონელზე დააწესებდა 25%-იან ტარიფებს, რასაც პეკინმა საპასუხო ზომების მიღებით უპასუხა, განაცხადა რა, რომ თავადაც 50 მილიარდი აშშ დოლარის 659 ამერიკულ პროდუქტზე, მათ შორის სოფლის მეურნეობის პროდუქტებზე, ავტომანქანებზე და ზღვის პროდუქტებზე ანალოგიურ პროცენტულ გადასახადებს დააწესებდა.

პრეზიდენტმა ტრამპმა აღნიშნა, რომ საპასუხო ზომებით ჩინეთი „ემუქრება ამერიკულ კომპანიებს, მუშებს და ფერმერებს, რომელთაც არავითარი მცდარი ნაბიჯი არ გადაუდგამთ“.

აშშ-სა და ჩინეთს შორის ურთიერთობების შემდგომი გაფუჭების შიშით, ორშაბათს საფონდო ბირჟები უკვე დაეცა.

შეერთებული შტატების პრეზიდენტმა განცხადება ორშაბათ ღამით გამოაქვეყნა, სადაც ნათქვამია, რომ მან თავის სავაჭრო მრჩეველებს სთხოვა მოახდინონ დამატებითი ჩინური პროდუქტების იდენტიფიცირება, რომელზეც ახალი ტარიფები უნდა დაწესდეს.

„თუკი ჩინეთი კვლავ გაზრდის მის ტარიფებს, ჩვენ ამ ქმედებას 200 მილიარდი აშშ დოლარის ღირებულების სხვა საქონელზე დამატებითი ტარიფების დაწესებით ვუპასუხებთ. სავაჭრო ურთიერთობები ამერიკის შეერთებულ შტატებსა და ჩინეთს შორის გაცილებით სამართლიანი უნდა იყოს“.