იუსტიციის მინისტრობის კანდიდატს თეა წულუკიანს „ევროპული საქართველოს“ დეპუტატმა ირმა ნადირაშვილმა საკომიტეტო მოსმენისას უთხრა, რომ მან სასამართლო რეფორმა „მთლიანად ჩააფლავა“ და მისი პარლამენტში ისევ მინისტრობის კანდიდატის რანგში ყოფნა „უხერხულია“.

ნადირაშვილმა აღნიშნა, რომ თეა წულუკიანი „ახლა ბიძინა ივანიშვილისთვის თავის მოწონებას“ ცდილობს, რომ „რამენაირად თანამდებობა შეინარჩუნოს“.

„როგორი არაადეკვატურიც არის ის, რომ ჩვენ აქ დღეს ვხედავთ თეა წულუკიანს წარმოდგენილს როგორც კანდიდატს იუსტიციის მინისტრობისას, სწორედ ასეთივე არაადეკვატური გამოსვლა ჰქონდა ქალბატონ თეას. ჩვენ არ ველოდებოდით იმაზე საუბარს, რაზეც ისაუბრეთ. მე, პირადად თქვენგან, ქალბატონო თეა, ველოდები პასუხებს, როგორ მოხდა რომ თქვენ ხელი ვერ შეუშალეთ მაგალითად, ჩატაევის ციხიდან გამოსვლას და შუა ქალაქში მივიღეთ კრიზისი თქვენს გამო. როგორ მოხდა რომ, ჩააფლავეთ მთლიანად სასამართლო რეფორმა? როგორც მოხდა, რომ თქვენი მადლობები მოვისმინეთ შოთაძის მისამართით მაშინ, როდესაც ქალაქის ცენტრში ასევე კრიზისი გქონდათ შექმნილი და ადამიანები ითხოვნდნენ, რომ სამართლიანად ყოფილიყო გამოძიებული საქმე? ამ კითხვებზე უნდა გვესაუბროთ ჩემი აზრით და არა ისევ ბოღმა ანთხიოთ, როგორც ამას აკეთებთ ამდენი წლის განმავლობაში. გამოდით, ნუ ხართ ჩარჩენილი წარსულში და ნუ ცდილობთ ახლა ბიძინა ივანიშვილისთვის თავის მოწონებას ამ ტრიბუნიდან, რომ რამენაირად თანამდებობა შეინარჩუნოთ. უხერხულია აქ რომ ზიხართ, როდესაც მთელი არასამთავრობო სექტორი აცხადებს, რომ თქვენთან საუბარიც არ უნდათ“, განაცხადა ირმა ნადირაშვილმა.