„ერთიანი ნაციონალური მოძრაობის“ დეპუტატი სალომე სამადაშვილი იუსტიციის მინისტრობის კანდიდატის, თეა წულუკიანისაგან პასუხს ითხოვს იმის შესახებ თუ „როდის იქნება ამ ქვეყანაში ისეთი ვითარება, რომ სუს-ი არ იქნება გამოყენებული პოლიტიკური კონტროლის ინსტრუმენტად“.

„დაფიქსირდა შემთხვევები, როდესაც სუს-ი აწარმოებს უკანონო მიყურადებას და თვალთვალს პოლიტიკური პარტიის წარმომადგენლების კონტროლისთვის. სამწუხაროდ, ამ ქვეყანაში სუს-ი კვლავ რჩება პოლიტიკური კონტროლის ინსტრუმენტად. ამაზე დაიწერა უკვე ძალიან მნიშვნელოვანი შეფასებები, მათ შორის ჩვენი საერთაშორისო პარტნიორების ჩართულობით და მაინტერესებს თუ არსებობს საერთოდ რაიმე გეგმა და ზოგადად, მაინტერესებს, როდის იქნება ამ ქვეყანაში ისეთი ვითარება, რომ სუს-ი არ იქნება გამოყენებული პოლიტიკური კონტროლის ინსტრუმენტად, როგორც სამწუხაროდ ეს ხდება დღეს“, განაცხადა სალომე სამადაშვილმა საკომიტეტო მოსმენის ფარგლებში.