ერთი და იგივეს საუბრობთ - ამოიღეთ თქვენი საუბარი, კვირიკაშვილის საუბარი, ივანიშვილის საუბარი და ღარიბაშვილის საუბარი და ჩვენ უნდა დაგისვათ ახლა იმაზე შეკითხვები, თუ რას აპირებთ? - ვერაფერსაც ვერ გააკეთებთ, ასე მიმართა „ერთიანი ნაციონალური მოძრაობის" პოლიტსაბჭოს თავმჯდომარემ, ნიკა მელიამ პარლამენტში ფრაქცია „ნაციონალური მოძრაობის" სხდომაზე პრემიერ მინისტრობის კანდიდატს, მამუკა ბახტაძეს.

მელიამ პრემიერ მინისტრობის კანდიდატს „საქართველოს რკინიგზის" ხელმძღვანელი პირის პოსტზე საქმიანობის შესახებ შეკითხვები დაუსვა.

„არც რწმენა იგრძნობა, როცა თქვენ გისმენთ, დაღლილი, ენერგიაგამოცლილი, შინაარსისგან დაცლილი მინისტრთა კაბინეტი გაქვთ.... თქვენი მართველობის პერიოდში, რკინიგზაში ტვირთბრუნვა განახევრდა 50%-ით, შემოსავლები შემცირდა 50%-ით - რას უკავშირებთ ამ ყველაფერს? ახლა ჩვენ გვესაუბრებით - ამას გავაკეთებ, იმას გავაკეთებ, განათლებული ახალგაზრდა ვარ, ბიძინა ივანიშვილი გვერდში მიდგას, რეფორმებს გავატარებ და პრაქტიკაში მნახეთ თქვენ რა შეგიძლიათ. 50%-ით გაანახევრეთ შემოსავალი რკინიგზაში - ეს ერთი და მეორე - საქართველოს რკინიგზაში შემოწმების მიზნით, სახელმწიფო აუდიტის სამსახური შემოვიდა, მაგრამ თქვენგან კატეგორიული უარი მიიღო.... რკინიგზა და აუდიტის სამსახური 5 თვის განმავლობაში დაობდა სასამართლოს ორ ინსტანციაში და მოგიგოთ, აუდიტის სამსახურს დოკუმენტაციას ახლაც არ აძლევთ.... შემთხვევით, ხომ არ უკავშირდება ეს ყველაფერი თქვენი საქმინობისთვის ხელისშეშლას, ანუ დაფარვას იმ მრავალწლიანი საქმიანობის, რომელსაც ადგილი ჰქონდა", მიმართ ნიკა მელიამ მამუკა ბახტაძეს.