თბილისის მერმა, კახა კალაძემ დედაქალაქის მთავრობის დღევანდელ სხდომაზე მოადგილეს, ილია ელოშვილს დაუმთავრებელი შენობა-ნაგებობების პრობლემემის მოგვარების მიზნით, კონკრეტული გეგმის წარმოდგენა დაავალა.

როგორც კალაძემ აღნიშნა, ამ საკითხში მერიას ცენტრალური ხელისუფლების სრული მხარდაჭერა აქვს.

„მე მქონდა საუბარი ბატონ მამუკა ბახტაძესთან და მინდა გითხრათ, რომ არის სრული მხარდაჭერა და თანადგომა, რომ ჩვენი მხირდან იქნას წარმოდგენილი კონკრეტული ნაბიჯები, თუ რა ნაბიჯები უნდა გადაიდგას იმისთვის, რომ ეს პრობლემა იქნას მოგვარებული. ამიტომ, მე მინდა ჩემს მოადგილეს, ილია ელოშვილს დავავალო, რომ უახლოეს დღეებში წარმოადგინოთ გეგმა, ცენტრალური ხელისუფლება მზად არის თანამშრომლობისთვის, თუ რამე არის საჭირო მათი მხრიდან რომ გადაიდგას ნაბიჯები, ერთიანი ძალისხმევით ჩვენ მზად ვართ ამისთვის, რომ პრობლემები აწუხებს ადგილობრივ მოსახლეობას იმიტომ, რომ ყველა რაიონში ასეთი შენობა-ნაგებობები, ერთი მხრივ, სერიოზულ პრობლემას წარმოადგენს ქალაქის იერსახისთვის და მეორე ასევე, სერიოზული პრობლემაა იქ მცხოვრები ადამიანებისთვის - ბევრი ადგილი და ლოკაციაა, სადაც უკვე მშენებლობა დაწყებულია, საძირკველი ამოღებულია, რამდენიმე სართული აშენებულია და გაჩერებულია წლების განმავლოაში და ანტისანიტარიის ბუდედ იქცა. ამიტომ, დროულად, რაც შეიძლება სწრაფად წარმოადგინეთ გეგმა, თუ რა უნდა გაკეთდეს იმისთვის, რომ ეს პრობლემა იქნას მოგვარებული", განაცხადა კახა კალაძემ მთავრობის სხდომაზე.