პრემიერ მინისტრობის კანდიდატი მამუკა ბახტაძე პარლამენტის რიგგარეშე სხდომაზე მთავრობის განახლებულ პროგრამას წარმოადგენს.

მან თქვა, რომ მთავრობა მაქსიმალურად უნდა იყოს ორიენტირებული ადამიანზე და არსებული პრობლემების გადაწყვეტაზე.

„მცირე მთავრობის კონცეფცია აუცილებელია იმისათვის, რომ ჩვენი მთავრობის პროგრამა სწრაფად და ეფექტურად განვახორციელოთ“, აღნიშნა ბახტაძემ და ოპოზიციის მიერ სამშაბათს გამოთქმულ ბრალდებებზე გააკეთა აქცენტი, რომელიც „საქსრთველოს რკინიგზაში“ აუდიტის სამსახურის თითქოს არშეშვებას ეხებოდა, რაზეც ბახტაძემ თქვა, რომ ეს არის ბრალდება, რომელიც „ბუნებაში არ არსებობს“, რადგან 2017 წელს აუდიტის სამსახურს სრულად მიეცა საშუალება რკინიგზის სამსახურში შესვლისა და მუშაობის.

პრემიერობის კანდიდატმა თქვა, რომ ნამდვილად არ სურს წარსულზე საუბარი, მაგრამ „როცა ჩვენ ვისმენთ უსაფუძვლო ბრალდებებს, როგრიც იყო გუშინ“, მაშინ სიმართლე უნდა ითქვას.

„არავინ არ აპირებს ფოკუსირებას იმ 9 წელზე. ჩვენ უნდა ვიყოთ ფოკუსირებული მომავალზე. აქიდან გამომდინარე, პროგრამა არის ორიენტირებული მომავალზე. თუ არსებობს ხარვეზები ამ პროგრამაში, ერთად განვიხილოთ, მაგრამ მე თქვენგან ასეთი რამე ვერ მოვისმინე“, მიმართა ბახტაძემ ოპოზიციას.