საპარლამენტო უმრავლესობის წევრი ილია წულაია თბილისში მიწისქვეშა პარკირების მოწყობაზე გამოცხადებულ ინტერესთა გამოხატვის ჩავარდნას ეხმაურება და სინანულს გამოხატავს იმის გამო, რომ „არავის გაუჩნდა სურვილი სიმბოლურ ფასად მიეღო და განეხორციელებინა ეს ქალაქისთვის საჭირო პროექტი“.

„არ შემიძლია არ გამოვეხმაურო მიწისქვეშა პარკირების მოწყობაზე გამოცხადებულ ინტერესთა გამოხატვის ჩავარდნას. დასანანია, რომ არავის გაუჩნდა სურვილი სიმბოლურ ფასად მიეღო და განეხორციელებინა ეს ქალაქისთვის საჭირო პროექტი. ერთისმხრივ სერიოზული საკომუნიკაციო სამუშაოა გასაწევი მსხვილ საინვესტიციო და ფინანსურ ჯგუფებთან, რომ ამ პროექტში გვერდით დაუდგნენ მერიას და მიიღონ მონაწილეობა დედაქალაქის სატრანსპორტო პრობლემების მოგვარებაში.

„მეორეს მხრივ, ძალიან საინტერესოა ჩვენი პოლიტიკური ოპონენტების შეფასებები ამ თემასთან დაკავშირებით, მიწისქვეშა პარკინგის მშენებლობის ანალოგიური შემთხვევა, პუშკინის სკვერის ქვეშ, მახსოვს პოლიტიკური განცხადებების და შეთქმუნების თეორიების აგების საბაბი გახდა ყოფილი ხელისუფლების წარმომადგენლების მხრიდან. მიწისქვეშა ავტოსადგომების მოწყობა თბილისში ნაწილობრივ საქველოქმედო პროექტია - ნებისმიერი, ბიზნესში ოდნავ მაინც გარკვეული ადამიანი, დამეთანხმება ამაში. შესაბამისად ნებისმიერი კომპანია თუ ინვესტორი ვინც ამ ინტერესთა გამოხატვაში მიიღებს მონაწილეობას არის დასაფასებელი, მხარდასაჭერი და არა საკუთარი პოლიტიკური ამბიციების და პარტიული ინტერესების გამო ცილისწამებაში და კრიტიკაში გასახვევი. იმედი მაქვს ჩვენი ქვეყნის ბიზნესი მოახდენთ თავისი ძალების და საერთაშორისო კონტაქტების მაქსიმალურ მობილიზებას, რომ მხარი ავუბათ მერიის ისეთ პროექტებს, რაც თბილისელების და დედაქალაქის სტუმრების მაქსიმალურ კომფორტს შეუწყობს ხელს“, აცხადებს ილია წულაია.