აშშ-ის შტატ მერილენდში შეიარაღებულმა მამაკაცმა ადგილობრივი გაზეთის ოფისში ცეცხლი გახსნა, რის შედეგადაც მოკლულია 5 ადამიანი, დაზიანებები აქვს მიყენებული რამდენიმე სხვა ადამიანს.

ანაპოლისში გამომავალ „Capital Gazette“-ის თანამშრომლებმა განაცხადეს, რომ საფანტის თოფით და ყუმბარებით შეიარაღებულმა თავდამსხემლმა ახალი ამბების ოთახში მინის კარების ჩაცხრილვის შემდეგ შეაღწია.

აშშ-ის მედიამ პოლიციის მიერ დაკავებული ეჭვმიტანილის ვინაობა დაასახელა. იგი 40 წლამდე თეთრკანიანი მამაკაცი, ჯეროდ რამოსია, რომელმაც გავრცელებული ცნობით, 2012 წელს რეპუტაციის შელახვისთვის გაზეთს წარუმატებლად უჩივლა.

პოლიციას თავდასხმის მოტივი არ დაუდასტურებია, თუმცა განაცხადა, რომ ეს „გამიზნული თავდასხმა“ იყო.

პოლიციის ცნობით, დაკავებული ეჭვმიტანილი დაკითხვაზეა გადაყვანილი.

„ეს გამიზნული თავდასხმა იყო „Capital Gazette“-ზე“, განაცხადა ადგილობრივი პოლიციის მაღალჩინოსანმა, რომლის თქმითაც, შეიარაღებული მამაკაცი „შენობაში საფანტიანი თოფით შევიდა და თავის მსხვერპლს ეძებდა იმ დროს, როცა იგი უფრო დაბალ დონეზე გადაადგილდებოდა“.

ოლქის პოლიციის ხელმძღვანელმა CNN-ს უთხრა, რომ ეჭვმიტანილი შენობაში სამუშაო მაგიდის ქვეშ იმალებოდა, როდესაც პოლიციის ოფიცრები ინციდენტის შესახებ ინფორმაციის მიღებიდან „60 წამში“ მივიდნენ გაზეთის ოფისში. მან თქვა, რომ „ცეცხლის ორმხრივ გახსნას ადგილი არ ჰქონია“.