წყალარინების სისტემაში ნარჩენების ჩაყრა ფიზიკური და იურიდიული პირების დაჯარიმებას გამოიწვევს - პარლამენტის წევრების, კახაბერ კუჭავას, სულხან მახათაძის, კობა ლურსმანაშვილის, ენძელა მაჭავარიანის და ზაზა ხუციშვილის მიერ საკანონმდებლო ინიციატივის წესით მომზადებული კანონპროექტები, მეორე მოსმენით გარემოს დაცვისა და ბუნებრივი რესურსების კომიტეტის სხდომაზე განიხილეს.

პარლამენტის პრესსამსახურის ცნობით, კომიტეტის თავმჯდომარემ, კახა კუჭავამ დეპუტატებს „წყლის შესახებ“ საქართველოს კანონში ცვლილების შეტანის შესახებ“ და „საქართველოს ადმინისტრაციულ სამართალდარღვევათა კოდექსში ცვლილების შეტანის შესახებ“ კანონპროექტები მუხლობრივად გააცნო და იურიდიულ საკითხთა კომიტეტისა და მთავრობის მხრიდან გამოთქმულ შენიშვნებზე ისაუბრა.

მისი განცხადებით, კანონპროექტების ავტორებმა სრულად გაიზიარეს და მეორე მოსმენისთვის წარმოდგენილ რედაქციაში, მათ მიერ გამოთქმული მოსაზრებები ასახეს.

წარმოდგენილ კანონპროექტებს პარლამენტი დაჩქარებული წესით განიხილავს. შესაბამისად, დღევანდელ პლენარულ სხდომაზე, კანონმდებლები აღნიშნულ საკითხებს მეორე და მესამე მოსმენით უყრიან კენჭს.