ნაძალადევის მაჟორიტარმა დეპუტატმა, სოფო კილაძემ თბილისის გენერალური გეგმის შესახებ განცხადება გააკეთა. კილაძის თქმით, გეგმა ძალიან ბევრ პრობლემას მოაგვარებს როგორც ქალაქის მცხოვრებლებისთვის, ისე სტუმრებისთვის. კილაძე ასევე განმარტავს, რომ აქამდე არსებული პრობლემების ერთ-ერთი ძირითადი მიზეზი სწორედ ამ გეგმის არარსებობა იყო.

„წლების განმავლობაში თბილისი ქაოტურად ვითარდებოდა და შედეგად მივიღეთ უამრავი პრობლემა, რომელიც ქალაქის მცხოვრებლებისა და სტუმრებისთვის სერიოზულ დისკომფორტს ქმნის. მაგალითად, ქაოტური მშენებლობები, საცობები გზებზე, რეკრეაციული ზონების ნაკლებობა და მისგან მომდინარე ეკოლოგიური პრობლემები. პირველ რიგში, ამ ქაოსის საფუძველია ისაა, რომ ქალაქს არ ჰქონდა გენერალური გეგმა, რომელიც გარკვეულ ჩარჩოში მოაქცევდა ამ პრობლემებს და დაარეგულირებდა მათ.

კახა კალაძე წინასაარჩევნო კამპანიის დროს დაპირდა საზოგადოებას, რომ შექმნიდა ამ გეგმას და მან შეასრულა ეს დაპირება უმოკლეს ვადებში. მე, როგორც ნაძალადევის მაჟორიტარი, მივესალმები გენერალურ გეგმას და მგონია, რომ იგი წარმატებით განხორციელდება. ღრმად ვარ დარწმუნებული, რომ თბილისის გენერალური გეგმა ძალიან ბევრ პრობლემას მოაგვარებს ქალაქის მცხოვრებლებისა და სტუმრებისთვის“, განაცხადა სოფო კილაძემ.