„ევროპული საქართველოს" წარმომადგენელი ზურაბ ჭიაბერაშვილი, აჭარის მთავრობის თავმჯდომარის კანდიდატურასთან დაკავშირებით, პრეზიდენტსა და მმართველ პოლიტიკურ გუნდს შორის კინკლაობას არ გამორიცხავს და როგორც ჭიაბერაშვილი აცხადებს, მით უფრო იმ ფონზე, როდესაც „ქართულ ოცნებას" პრეზიდენტ გიორგი მარგველაშვილთან კონფრონტაციული დამოკიდებულება აქვს.

„ქართულ ოცნებას" რომ თავიდანვე კონფრონტაციული დამოკიდებულება არ ჰქონოდა პრეზიდენტ მარგველაშვილთან და არ ყოფილიყო ინსტიტუციური მუდმივი კინკლაობა, რა თქმა უნდა, ეს სამართლებრივი კოლიზია არ გახდებოდა კიდევ ერთი დავის საგანი, მაგრამ სწორედ იმის გამო, რომ „ქართულმა ოცნებამ" დაიწყო ბრძოლა პრეზიდენტის ინსტიტუტთან, დღეს, ბუნებრივია, გაჩნდა შესაძლებლობა, რომ ვიხილოთ კიდევ ერთი კინკლაობა პრეზიდენტსა და მმართველ პარტიას შორის იმასთან დაკავშირებით, თუ ვინ უნდა იყოს აჭარის მთავრობის თავმჯდომარე", განაცხადა ჟურნალისტებთან საუბრისას ზურაბ ჭიაბერაშვილმა.

აჭარის მთავრობის თავმჯდომარის პოსტი მეორე დღეა ვაკანტურია. ზურაბ პატარაძემ გადადგომის შესახებ განცხადება გუშინ, 4 ივლისს საგანგებო ბრიფინგზე გააკეთა.

ცნობილია, რომ მმართველ გუნდში აჭარის მთავრობის მეთაურის კანდიდატურასთან დაკავშირებით კონსულტაციები გრძელდება. გავრცელებული ინფორმაციით, აღნიშნულ პოსტზე რადენიმე კანდიდატი განიხილება - ერთი-ერთი სავარაუდო კანდიდატი თორნიკე რიჟვაძე ენერგეტიკის განვითარების ფონდის ხელმძღვანელი, ხოლო მეორე აჭარის ჯანდაცვის მინისტრი ზაალ მიქელაძეა.