აშშ-ის ელჩის მოვალეობის შემსრულებელი საქართველოში ელიზაბეთ რუდი ხადას ხეობაში ამერიკელი ცოლ-ქმრის, სმიტების და მათი მცირეწლოვანი შვილის მკვლელობის გამო მწუხარებას გამოთქვამს და ამავეს დროს ქართველ სამართალდამცველებს, მკვლელობის საქმის გამოძიებისთვის მადლობას უხდის.

„ხადას ხეობაში მომხდარი მკვლელობის გამო შოკში ვართ. ღრმა მწუხარებას გამოვთქვამთ და ვუერთდებით ყველა იმ ქართველსა და ამერიკელს, ვინც გარდაცვლილების მეგობრები იყვნენ.

სმიტების ოჯახს, რომლებიც მარნეულში ცხოვრობდნენ, თავისი წვლილი შეჰქონდა ეკონომიკურ განვითარებაში.

ვმუშაობთ ქართველ სამართალდამცველებთან ერთად. ყველაფერს გავაკეთებთ, რომ გარდაცვლილის ოჯახს მხარში დავუდგეთ. მადლობა მინდა გადავუხადო ქართულ სამართალდამცავ უწყებებს, რომლებმაც საქმე გამოიძიეს“, განაცხადა რუდმა.

გარდაცვლილი ოჯახის მკვლელობასთან დაკავშირებით საქართველოში აშშ-ის საელჩოსთან სოლიდარობის აქცია გაიმართა.

ხადას ხეობაში აშშ-ის ორმაგი მოქალაქეობის მქონე ცოლ-ქმრის და მათი 4 წლის შვილის მკვლელობის საქმესთან დაკავშირებით შინაგან საქმეთა სამინისტროს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს უფროსმა, მამუკა ჭელიძემ ორშაბათს გამართულ ბრიფინგზე განაცხადა, რომ საგამოძიებო მოქმედებების შედეგად, დამამძიმებელ გარემოებაში ჩადენილი, ორი ან მეტი პირის, განზრახ მკვლელობის ბრალდებით, 1998 წელს დაბადებული პირი დააკავეს. მის მიერ ჩადენილი დანაშაული უვადო თავისუფლების აღკვეთას ითვალისწინებს.