„შენების მოძრაობის“ ერთ-ერთმა ლიდერმა, თენგიზ შერგელაშვილმა განაცხადა, რომ თბილისის მერიამ „სითი პარკი“ გაუშვა, მაგრამ პარკირების პრობლემა ვერ მოაგვარა და მძღოლების უკმაყოფილებაც გამოიწვია. შერგელაშვილმა ასევე მერიის მიერ გამოცხადებულ ინტერესთა გამოხატვაზე გააკეთა აქცენტი და აღნიშნა, რომ მერიის გამოცხადებულ პროექტს ინვესტორები არ გამოეხმაურებიან მანამ, სანამ არ მოხდება პარკირების საფასურის დიფერენცირება გაჩერების ადგილებისა და ავტომობილების ტიპების მიხედვით.

„ „სითი პარკის“ გაშვებას მძღოლების უმრავლესობაში აღფრთოვანება მოჰყვა, თუმცა პარკირება კვლავ ისეთივე მოუგვარებელი პრობლემაა თბილისში, როგორიც იყო. მერიის მიერ გამოცხადებულ კონკურსს, ინვესტორები რატომღაც არ გამოეხმაურნენ, არადა, გარკვეული პირობების შექმნის შემთხვევაში, ამგვარი ინტერესი ნამდვილად იქნებოდა:

1. პარკირების საფასური - ზონების, გაჩერების ადგილების და მანქანების ტიპების მიხედვით უნდა იყოს დიფერენცირებული; წინააღმდეგ შემთხვევაში კერძო ინვესტორი არასოდეს დაინტერესდება კერძო საპარკინგე ადგილების მოწყობით და არც ცენტრში გადატვირთულობის პრობლემა მოიხსნება.

2. „სითი პარკის", მერიის სატრანსპორტო, თუ ნებისმიერი სხვა კომპანიით ჩანაცვლება პარკირების ადგილების რაოდენობაზე ავტომატურად არ აისახება. მერიამ, უნდა იზრუნოს შესაბამისი ადგილების გამოყოფაზე, რომელთა მართვას კონკრეტული კომპანია განახორციელებს.

სამწუხაროა, რომ მერიას არ სურს საკითხის სიღრმისეული შესწავლა და დღემდე ვერ გვთავაზობს ქალაქის წინაშე არსებული პრობლემის სისტემური გადაწყვეტის გზას", აცხადებს თენგიზ შერგელაშვილი.

ინფორმაცია GUARDIAN.GE - ის „შენების მოძრაობამ“ მოაწოდა.