სვანიძის ქუჩაზე სტიქიის შედეგად 24 ოჯახი უსახლკაროდ დარჩა. როგორც ვაკის გამგებელმა ლაშა აბაშიძემ განაცხადა, 24-მა ოჯახმა გააკეთა განაცხადი უსახლკაროდ დარჩენის შესახებ.



ლაშა აბაშიძის თქმით, ანალოგიური აღწერა წყნეთის ხევშიც ჩატარდება, რის შემდეგაც დღესვე მოხდება ბინების დაქირავება, ქირის უზრუნველყოფით დაზარალებულებისთვის. რაც შეეხება სახლებს, რომელთა რეაბილიტაცია სტიქიის შედეგად შეუძლებელია, ვაკის გამგებელმა აღნიშნა, რომ ჯერჯერობით მათი აღწერა ვერ ხდება, რადგან სახლები დატბორილია და მიმდინარეობს წყლის ამოტუმბვის სამუშაოები. მაშველებმა დატბორილი ადგილებიდან რამდენიმე ავტომობილი ამოიყვანეს.



ადგილზე იმყოფებოდა თბილისის მერის მოადგილე დიმიტრი ქუმსიშვილი და ენერგეტიკის მინისტრი კახა კალაძე.