„ერთიანი ნაციონალური მოძრაობის" პოლიტიკური საბჭოს წევრი გიორგი ბარამიძე „ევროპული საქართველოს“ და  „ნაციონალური მოძრაობის” მიერ საპრეზიდენტო არჩევნებთან დაკავშირებით სამპუნქტიანი მემორანდუმის გააფორმებას ეხმაურება და აცხადებს, რომ მსგავსი ტიპის დოკუმენტი საჭიროა იმისთვის, რომ „საქართველო გადავარჩინოთ ამ ჭირისგან, რასაც ჰქვია ივანიშვილის რეჟიმი".

„ამ დოკუმენტში აღნიშნულია, რომ ეს ყველაფერი ხდება იმისთვის, რათა რეჟიმი შეიცვალოს საქართველოში. ამისთვის, ბუნებრივია, ყველანაირი საღი აზრი ამას გვეუბნება, რომ საჭიროა, ერთიანობა, ყველა პროდასავლურად მოაზროვნე პოლიტიკური ძალის, განურჩევლად იმისა, თუ ვის რა უთანხმოება თუ წყენა გვქონდა შორეულ წარსულში თუ ახლო წარსულში. ჩვენი მოვალეობაა, თუკი ვართ სერიოზული პოლიტიკოსები, გადავდოთ მაქსიმალურად გვერდზე ის, რაც გვაშორებს ერთმანეთს, ის, რაც რაღაც კონფლიქტურია ჩვენს შორის და წინა პლანზე წამოვწიოთ ის, რაც გაახლოებს იმისთვის, რომ სწორედ საქართველო გადავარჩინოთ ამ ჭირისგან, რასაც ჰქვია ივანიშვილის რეჟიმი, რომელიც ვხედავთ, რომ ქვეყანას შიგნიდან ჭამს", განუცხადა „რუსთავი 2"-ს გიორგი ბარამიძემ ბრიუსელში.

„ევროპულმა საქართველომ“ და „ერთიანმა ნაციონალურმა მოძრაობამ” საპრეზიდენტო არჩევნებთან დაკავშირებით, სამპუნქტიანი მემორანდუმი გააფორმეს.

შეთანხმების მიხედვით ოპოზიციური პარტიები მხარს დაუჭერენ მეორე ტურში გასულ ერთმანეთის კანდიდატებს. საარჩევნო კამპანიის დროს თავს შეიკავებენ ურთიერთკრიტიკისგან.

ამასთან, პარტიები თანხმდებიან, რომ მხოლოდ არჩევნებია ხელისუფლების შეცვლის გზა და მაქსიმალურად მოახდენენ ამომრჩევლის მობილიზებას.