იუსტიციის მინისტრმა, თეა წულუკიანმა შალვა თადუმაძის მთავარ პროკურორად არჩევის შემდეგ განცხადება გააკეთა მედიის წარმომადგენლებთან. წულუკიანი არ მალავს მის კავშირებს თადუმაძესთან და ამბობს, რომ საპროკურორო საბჭომ ყველას დაანახა, თუ რა ერთსულოვანია ის.

წულუკიანმა ასევე შალვა შავგულძის გადაწყვეტილებაზეც გააკეთა კომენტარი და თქვა, რომ მან ოთარ კახიძეთან კონსულტაციის შემდეგ მოხსნა კანდიდატურა.

„საპროკურორო საბჭომ დღეს, ყველას დაანახა, რომ არის ერთსულოვანი იმით, რომ მათი მოსაწონი კანდიდატი არის შალვა თადუმაძე. ბატონმა შალვა შავგულიძემ საბჭოს სამწუხაროდ, თავისი კანდიდატურა მოხსნა მას შემდეგ, რაც ბატონი ოთარ კახიძე სხდომიდან გავიდა და მას გაუწია კონსულტაცია, რომ კანდიდატურა მოეხსნა.

ეს არ არის დასამალი, რომ ეს კავშირი მე მასთან მაქვს, თანამებრძოლი ვარ, თანამოაზრე ვარ და შალვა თადუმაძის შვილის ნათლია ვარ.

მე დღეს კენჭისყრაში არ მივიღე მონაწილეობა იმისთვის, რომ ჩემი კენჭისყრაში მონაწილეობით რაიმე ტიპის, თუნდაც პატარა ჩრდილი არ მისდგომოდა ისეთი მაღალი კვალიფიკაციის მქონე ადამიანების გადაწყვეტილებას, როგორებიც არიან, მაგალითად ბატონი თემურ ღონიავა, ქალბატონი ირმა ჭკადუა და სხვა დანარჩენი საბჭოს წევრები“, განაცხადა თეა წულუკიანმა.

იუსტიციის მინისტრის მოვალეობის შემსრულებელმა, მიხეილ სარჯველაძემ საპროკურორო საბჭოს მთავარი პროკურორობის კანდიდატები 6 ივლისს წარუდგინა: ნინო გოგნიაშვილი, შალვა თადუმაძე და შალვა შავგულიძე.

კანდიდატების მოსმენამდე შალვა შავგულიძემ მთავარი პროკურორის პოსტზე საკუთარი კანდიდატურა მოხსნა. როგორც თავად შავგულიძე აცხადებს, ამის მიზეზი პროცესის გაუმჭვირვალობაა.

საქართველოს მთავარი პროკურორის პოსტზე საპროკურორო საბჭომ შალვა თადუმაძის და ნინო გოგნიაშვილის კანდიდატურებს შორის, თადუმაძის კანდიდატურას, ხმათა აბსოლუტური უმრავლესობით, 12 არც ერთის წინააღმდეგ, დაუჭირა მხარი.