ლენტეხის მუნიციპალიტეტში, ცანის ადმინისტრაციული ერთეულის სოფელ ზესხოს მიმდებარე ტერიტორიაზე, ტყის მასივში გაჩენილი ხანძრის ლიკვიდაცია ამ დრომდე ვერ ხერხდება. როგორც GUARDIAN.GE-ს ლენტეხის მერმა, ბადრი ლიპარტელიანმა განუცხადა, ტყეში მუშაობს ცოცხალი ძალა, გუშინ ქრობის პროცესში, შსს-ს სასაზღვრო პოლიციის ვერტმფრენიც ჩაერთო და ამ დრომდე აგრძელებს მუშაობას, მძიმე ტექნიკაც მობილიზებულია, თუმცა რთული რელიეფური პიროებების გამო ვერ ხერხდება მათი გამოყენება.

„ამ დროისთვის, ტყეში ცოცხალი ძალა არის შესული, დაახლოებით 80 მეხანძრე-მაშველი მუშაობს და დამატებით ჩართულია ვერტმფრენიც. მძიმე ტექნიკაც გვყავს მობილიზებული, თუმცა რთული რელიეფური პირობების გამო ვერ ვახერხებთ მის გამოყენებას“, განაცხადა ბადრი ლიპარტელიანმა.

 
მისი თქმით, დღეს დილით შესაძლებელი იქნებოდა ხანძრის ლიკვიდაცია, გუშინდელ ქარს ახალი კერები რომ არ გაეჩინა. 

დრონით გადაღებულ ვიდეოს, საგანგებო სიტუაციების მართვის სამსახური ავრცელებს.

„გუშინ, ხანძრის კერები შედარებით ნაკლები იყო და სავარაუდოდ დღეს მოხერხდებოდა ლიკვიდაცია, თუმცა ღამით ქარმა გაფანტა ნაპერწკლები და გააჩინა ახალი კერები, სახიფათო არაფერია, მაგრამ სამუშაო ბევრია. დღეს, 11 საათიდან დაიწყო ვერტმფრენმა წყლის დასხმა, მიმდინარეობს ინტენსიური მუშაობა. სრული ლიკვიდაცია ვერ გეტყვით როდისთვის მოხდება, თუმცა დროული და სრული ლიკვიდაციისთვის საჭიროა ინტენსიური წვიმა“, აღნიშნა ლიპარტელიანმა.

ლენტეხის მერის თქმით, ხანძრის გამომწვევი მიზეზი ზუსტად არ არ არის ცნობილი, სავარაუდო მიზეზად კი მეხის ჩამოვარდნა სახელდება. 

„ხანძრის გამომწვევი მიზეზი სავარაუდოდ მეხის ჩამოვარდნა გახდა. მოსახლეობას არავითარი საფრთხე არ ემუქრება“, განუცხადა GUARDIAN.GE-ს ლენტეხის მერმა.