მინისტრის პორტფელის გარეშე დარჩენილი სოზარ სუბარი შესაძლოა სამეგრელო-ზემო სვანეთის გუბერნატორად დაინიშნოს. მამუკა ბახტაძეს „ქართული ოცნების“ ლიდერებთან აღნიშნული საკითხი უკვე განხილული აქვს და სავარაუდოდ, სუბარს და სხვა რეგიონების ახალ გუბერნატორებს მთავრობის დამტკიცების შემდეგ მალევე წარადგენს.

აღნიშნული ინფორმაცია GUARDIAN.GE-ის „ქართული ოცნების“ მაღალი თანამდებობის პირმა დაუდასტურა. თავად პრემიერ მინისტრი კი ჯერჯერობით მხოლოდ იმას ამბობს, რომ დევნილთა გაუქმებული სამინისტროს ყოფილი ხელმძღვანელი „ქართული ოცნების“ „ძალიან აქტიური და ეფექტური წევრია“ და იგი მომავალშიც „აუცილებლად იქნება მათ გუნდში“ წარმოდგენილი მისთვის შესაფერის პოზიციაზე.

„სოზარი გახლავთ ჩვენი პოლიტიკური გუნდის ძალიან აქტიური და ეფექტური წევრი. ძალიან ბევრი საქმე გააკეთა, მე ვფიქრობ, იმისთვის, იმ დავალების თავის გასართმევად, რომელიც მის უწყებას ჰქონდა ჩაბარებული და რა თქმა უნდა, აქედან გამომდინარე, აუცილებლად იქნება სოზარი ჩვენ გუნდში წარმოდგენილი იმ როლით, სადაც ის შეძლებს მაქსიმალურად თავისი ძლიერი მხარეების რეალიზაციას“, განაცხადა ბახტაძემ ოთხშაბათს გამართულ ბრიფინგზე და შეკითხვაზე, ჩაანაცვლებს თუ არა სუბარი სამეგრელო-ზემო სვანეთის ამჟამინდელ გუბერნატორს - უპასუხა: „მე მგონი, ამომწურავად გიპასუხეთ ამ თემაზე“.

პრემიერ მინისტრმა გუშინდელ ბრიფინგზე დაადასტურა, რომ გუბერნატორების დონეზე, უახლოეს პერიოდში მნიშვნელოვანი საკადრო ცვლილებები იგეგმება. ბახტაძემ რეგიონებში სახელმწიფო რწმუნებულების-გუბერნატორების შესაძლო შეცვლასთან დაკავშირებით დასმული შეკითხვის საპასუხოდ განაცხადა, რომ რეგიონული მმართველობის არსებული სტრუქტურა ვერ პასუხობს დღევანდელ გამოწვევებს რეგიონებში, აქედან გამომდინარე, „ერთ-ერთი პირველი გადაწყვეტილება, ერთ-ერთი პირველი ინიციატივა, რომელსაც ახალი მთავრობა გააკეთებს, იქნება ის, რომ ჩვენ განვახორციელოთ როგორც სტრუქტურული ცვლილებები, ისე მნიშვნელოვანი საკადრო ცვლილებები ამ მიმართულებით“.

„ამ ინსტიტუტს [გუბერნატორის] სჭირდება გაძლიერება და ისეთი ფორმატის მიცემა, რომელიც მოსახლეობისთვის იქნება მისაღები. ჩვენ არ გვჭირდება ისეთი ტიპის ბიუროკრატიული დონეები, რომელიც მოსახლეობას ვერ მოუტანს დამატებით სიკეთეს, დამატებით შეღავათს. მე ვფიქრობ, რომ ეს ინსტიტუტი აუცილებელია. მას სჭირდება გაძლიერება, მას სჭირდება ისეთი ტიპის მოქნილი სტრუქტურის შექმნა, რომელიც საშუალებას მოგვცემს, რომ მოსახლეობისგან მივიღოთ ის საკითხები, პრობლემური საკითხები, რომელიც ადგილზეა და ამავე დროს, ვიმუშაოთ აღმოფხვრაზე ამ საკითხების მაქსიმალურად, ოპერატიულ რეჟიმში... მე ვფიქრობ, რომ მმრათველობითი სტრუქტურების გარკვეული ნაწილის ეფექტურობა არის ძალიან დაბალი და ის საჭიროებს სერიოზულ ცვლილებებს, მათ შორის საკადრო ნაწილში“, განაცხადა მამუკა ბახტაძემ.