ნატოს გენერალური მდივნის, იენს სტოლტენბერგის ხუთაშაბათს ბრიუსელში გაკეთებულ განცხადებას იმის თაობაზე, რომ საქართველო ალიანსის წევრი გახდება, რუსეთის საგარეო საქმეთა სამინისტროს წარმომადგენელი მარია ზახაროვა გამოეხმაურა. მან თქვა, რომ ჩრდილო ატლანტიკურ ალიანსში ახალი წევრების, მათ შორის საქართველოს მიღების შემთხვევაში, მოსკოვი სათანადო ზომებს მიიღებს.

„ჩვენ ვსაუბრობდით იმის თაობაზე, რომ ალიანსში იმ ქვეყნების შესვლამ, რომლებიც მისი წევრები არ არიან, არ შეიძლება რომ გავლენა არ იქონიოს საერთო სურათზე, უსაფრთხოების მდგომარეობაზე ევროპის კონტინენტზე და რა თქმა უნდა, ექნება თავისი შედეგები. ეს ეხება არა მარტო საქართველოს, არამედ მთლიანად ჩვენს პრინციპულ პოზიციას“, განაცხადა ზახაროვამ.

მან ხაზი გაუსვა, რომ რუსეთი ყოველთვის საუბრობდა სამხედრო ბლოკის შესაძლო გაფართოების შედეგებზე.

„არც ისე დიდი ხნის წინ, მე მივეცი ინტერვიუ სკანდინავიურ გამოცემას, იმ ქვეყნის წარმომადგენელს, რომელიც არ არის ნატოს წევრი, მაგრამ აქტიურად მიიწევს მისკენ. მე დამისვეს შეკითხვა, რატომ საუბრობს რუსეთი იმის შესახებ, რომა ამას ექნება შედეგები. მე ვუპასუხე: იმიტომ, რომ მოხდება ცვლილებები, და როდესაც ცვლილელები ხდება ერთი მხრიდან, მეორე მხარესაც დგება შედეგები. ჩემი აზრით, ეს ბუნებრივი პროცესია“, აღნიშნა ზახაროვამ.