მამუკა არეშიძე აცხადებს, რომ იმ შემთხვევაში, თუ „ქართული ოცნების“ საპრეზიდენტო კანდიდატი ბიძინა ივანიშვილი იქნება, არც ერთ სხვა მის კონკურენტს არავითარი შანსი არ ექნება, თუმცა ექსპერტი ეჭვობს, რომ ივანიშვილმა მსგავსი გადაწყვეტილება მიიღოს „თუ არ იქნება გარემოებები, რომელიც მას აიძულებს ამ ნაბიჯის გადადგმას“.

„იმ შემთხვევაში, თუ ბიძინა ივანიშვილი იქნება საპრეზიდენტო კანდიდატი, მაშინ „ქართული ოცნების“ შანსი არჩევნების მოგების - იქნება ძალიან დიდი. არც ერთ მის კონკურენტს არავითარი შანსი არ ექნება. თუმცა არ ვიცი ეს ინფორმაცია შეესაბამება თუ არა სიმართლეს, რადგან მე რამდენადაც ვიცნობ ბიძინა ივანიშვილს, ის კომფორტულად გრძნობს თავს პარტიის თავჯდომარის პოსტზე და არ მგონია რომ მან ეს გადაწყვეტილება მიიღოს, რადგან არ უყვარს საჯარო პოლიტიკაში ყოფნა. მიუხედავად იმისა, რომ პრეზიდენტს შეზღუდული უფლებამოსილება აქვს, ის არის ფიგურა, რომელიც ქვეყანას საზღვარგარეთ წარმოადგენს და ვფიქრობ, ამ უფლებამოსილების შესრულება ბიძინა ივანიშვილს მაინც და მაინც არ უნდა, თუ არ იქნება გარემოებები, რომელიც მას აიძულებს ამ ნაბიჯის გადადგმას. ერთადერთი, შესაძლოა ჩვენი დასავლელი პარტნიორების პოზიცია იყოს ისეთი, რომ მას სთხოვონ თვითონ აიღოს პასუხისმგებლობა ამ მნიშვნელოვან პოსტზე, რომელიც საგარეო პოლიტიკას უკავშირდება. სხვა რამე გარემოებას ვერ ვხედავ“, განაცხადა მამუკა არეშიძემ.