„პატრიოტთა ალიანსის" წევრი ადა მარშანია პრემიერ მინისტრ მამუკა ბახტაძეს მოუწოდებს, რომ რუსეთის ფედერაციის მიმართულებით „უფრო მძიმე და ფართომასშტაბიანი" ნაბიჯების გადასადგმელად, საქართველოს მთავრობამ ახალი ფორმატები და მექანიზმები შექმნას.

როგორც მარშანიამ, პარლამენტის ფრაქცია „საქართველოს პატრიოტების" სხდომაზე, სადაც პრემიერ მინისტრსა და მთავრობის წევრებს უსმენენ, განაცხადა, რუსეთთან მოლაპარაკებისთვის, ამ დროისთვის არსებული ფორმატები საკმარისი არ არის.

„მე ძალიან ვწუხვარ, რომ საქართველოს ახალ პრემიერს იგივე უნდა ვუთხრა, რაც თავის დროზე კვირიკაშვილს ვუთხარი მისი დამტკიცების დროს და იგივე გავუმეორე თითქმის ერთი წლის თავზე, ამ შენობაში - პარლამენტში. ბ-ნო მამუკა, გაუგებარია, მიუღებელია, მიიღო, დაამტკიცო, მოგეწონოს ისეთი პრემიერ მინისტრის კანდიდატურა, პიროვნება, თუმცა, თქვენ უკვე დამტკიცებული ბრძანდებით, რომელიც არ აყენებს ქვეყნის გამთლიანების საკითხს უპირველეს საკითხად და ყველაზე მნიშვნელოვან საკითხად ქვეყანაში....

მე ვერანაირად ვერ გავუგებ იმ პრემიერ მინისტრს, რომელიც თავის პროგრამულ სიტყვას და გამოსვლას არ იწყებს უმთავრესით, უმძიმესით და სახერხემლო საკითხით ჩვენი ქვეყნისთვის, ჩვენი ქვეყნის ამ ეტაპზე განვითარებისთვის. ბ-ნო მამუკა, თქვენ ძალიან ახალგაზრდა ადამიანი ბრძანდებით, მე ვეჭვობ, რომ თქვენ მაინცდამაინც არ ხართ გარკვეული უმძიმეს და უბედურ საკითხში, რასაც ჰქვია აფხაზეთში მიმდინარე პროცესები, ცხინვალის რეგიონში მიმდინარე პროცესები. მე კიდევ ერთხელ, არამხოლოდ თქვენს გასაგონად და მთავრობის წევრების გასაგონად, არამედ სრულიად საქართველოს გასაგონად მინდა მოვიყვანო რამოდენიმე ტრაგიკული ფაქტი. იცით თქვენ თუ არა, რომ აფხაზეთში ახლა 60 000 ქართველია დარჩენილი, ისიც გალის რაიონის ხარჯზე. 70 000 აფხაზია და 80 000 სომეხი ეროვნების ადამიანი ცხოვრობს. თქვენ შეიძლება არც იცით ეს, რომ ყოველი წლის 30 სექტემბერს, სოხუმში, მოსახლეობა ზეიმობს ქართველ ოკუპანტ-დამპყრობელზე სამამულო ომში გამარჯვებას. აი, ამ იდეოლოგიით, იქ გაიზარდა უკვე ორი თაობა აფხაზების. იქ ცხოვრობენ ქართველი ახალგაზრდები, რომლებიც ომის შემდგომ არიან დაბადებულები და გაზრდილები და ძალიან ბუნდოვანი წარმოდგენა აქვთ მათ უკვე, რა არის დედა-საქართველო და რა ხდება ამ საქართველოში.... ჩვენ არ დაგვრჩა არც ერთი წამი დრო, ჩვენ ვერავის ვერ დაველოდებით, ჩვენ ვერაფერს ვერ დაველოდებით. ჩვენ უნდა შევქმნათ სასწრაფოდ, ბ-ნო პრემიერო, ახალი ფორმატები და ახალი მექანიზმები იმისთვის, რომ დავიწყოთ მძიმე, მაგრამ უფრო ფართომასშტაბიანი საუბრები რუსეთის ფედერაციის ხელმძღვანელობასთან....

ბ-ნო მამუკა, თქვენ რასაკვირველია, თქვენს გამოსვლაში ახსენეთ ეს საკითხი. ახსენეთ არაღიარების პოლიტიკა და თქვენი უპირველესი პრიორიტეტი, რაც თქვენ ახსენეთ, ეს იყო - ქართველი ხალხის ისტორიული არჩევანის ბოლომდე მიყვანა - ნატო-ში სრულფასოვანი ინტეგრაცია. შეიძლება, ეს საკამათოა თქვენთვის, მაგრამ მე დიდი ეჭვის ქვეშ ვაყენებ იმას, რომ ჩვენი ერის ისტორიული ოცნება არის ნატოში შესვლა. მე დიდი ეჭვის ქვეშ ვაყენებ ამ ისტორიულ ნატვრას. და მე არ მინდა, რომ ისტორიულ ნატვრად გადაგვექცეს ჩვენ სოხუმში და ცხინვალში შესვლა.... ჩვენ ნატოში შევდივართ თუ ჩვენ სოხუმში და ცხინვალში შევდივართ? ნატო ჩვვენ ამაში გვეხმარება, თუ ნატო ჩვენ, ამ ეტაპზე, გვიშლის ხელს?....

ჩვენ გთავაზობთ კონკრეტულ წინადადებებს და მექანიზმებს - ჩვენ მიგვაჩნია, რომ არც დევნილთა სამინისტრო უნდა იყოს, არც შერიგებისა და ინტეგრაციის სამინისტრო. ჩვენ მიგვაჩნია, რომ ქვეყანაში არსებობს სტრუქტურა, მას ჰქვია აფხაზეთის მთავრობა, ქვეყანაში სააკაშვილის დროს შეიქმნა ცხინვალის ადმინისტრაცია და ვინ, თუ არა ეს ორი სტრუქტურა უნდა იყოს დაკავებული ამ საკითხებით.... მათ ჩვენ უნდა დავუბრუნოთ წართმეული და დაკარგული ფუნქციები", მიმართა ადა მარშანიამ პრემიერ მინისტრსა და მინისტრთა კაბინეტის წევრობის კანდიდატებს.