პარლამენტში, ფრაქცია „ნაციონალურ მოძრაობასა“ და მთავრობის ახალ კაბინეტს შორის შეხვედრისას, ნიკა მელიამ თავდაცვის მინისტრობის კანდიდატს, ლევან იზორიას მიმართა და უთხრა - იმის მაგივრად, რომ თავი მოიწონოს იმით, რომ მასზე საერთაშორისო საზოგადოება საუბრობს, ჯობს ჯაშუშებს ფული საქართველოს ბიუჯეტიდან არ გადაუხადოს.

„6 წლის განმავლობაში ვიცით, რომ არც ერთი ჯაშუში არ გამოუვლენია თქვენს ხელისუფლებას, არც ერთი ჯაშუში არ გამოუვლენია ქართულ ოცნებას, ახლა გასაგები გახდა, რომ ჯაშუშებს კი არა ავლენთ, არამედ საქართველოს წინააღმდეგ მომუშავე პირებს ფულს საქართველოს ბიუჯეტიდან უხდით და რაც არ უნდა ისაუბროთ, უფრო მძიმე მდგომარეობაში ჩაიყენებთ თავს.

არ მიკვირს, სადაც ბატონი გახარია იძახის, რომ ინტერპოლის ძებნილი პირი ვერ შევამჩნიეთ მიუხედავდ იმისა, რომ დავაჯარიმეთო, არ არის ეს გასაკვირი. რაც არ უნდა მოინდომოთ და თქვათ, რომ საერთაშორისო დონეზე ხოტბას გასხამენ, თურმე რა მაგარი თავდაცვის მინისტრი ჰყავს ქართულ ოცნებას, კონკრეტულ კითხვებზე პასუხი უნდა გასცეთ არა რომელიმე ოპოზიციურ ფრაქციას, არამედ საზოგადოებას. ჯაშუში ამარაგებდა ჯარს და თქვენ ამბობთ, რომ იმდენად მაგარი ვარ, რომ ჩემზე საუბრობს მთელი საერთაშორისო საზოგადოება, აფერუმ თქვენ მაშინ“, განაცხადა ნიკა მელიამ.