საქართველოს ბიუჯეტში გაჩნდა 80 მილიონი ლარი, გაჩნდა იქედან გამომდინარე, რომ დაგროვებითი საპენსიო რეფორმის დაწყება გადაიდო 1-ლი იანვრისთვის, ამ თანხას რაში იყენებთ, ბ-ნო მამუკა, ამ შეკითხვით „ევროპული საქართველოს" წევრმა, დავით ბაქრაძემ პრემიერ მინისტრ მამუკა ბახტაძეს უმცირესობის სხდომის ფორმატში გამართული მოსმენისას მიმართა.

ბაქრაძე დაინტერესდა, იმ შემთხვევაში, თუ აღნიშნული თანხის დახარჯვა არ მოხდება 2018 წლის განმავლობაში რეფორმის გასატარებლად, მოემატება თუ არა პენსიონერებს პენსია, რაზეც მამუკა ბახტაძემ აღნიშნა:

„რეფორმა იწყება წელს და ამისთვის ბიუჯეტში არის თანხა განსაზღვრული, მაგრამ ეს არის ამ რეფორმის თანხა", - მთავრობის მეთაურის ამ განცხადების საპასუხოდ კი დავით ბაქრაძემ თქვა, რომ ოპოზიცია მკაცრად გააკონტროლებს, დაიხარჯება თუ არა აღნიშნული 80 მლნ დაგროვებითი რეფორმის წელს დაწყებისთვის.

„თქვენ ამ წუთას მითხარით, რომ დახარჯავთ ამ ფულს ამ რეფორმაში. თუ არ დახარჯავთ, ე.ი. მოგვრჩა 80 მლნ და შეგვიძლია 20 ლარით გავზარდოთ პირველი აგვისტოდან პენსია, 75 მლნ ლარი სჭირდება ამას. ვერ გავიგე, ბ-ნო მამუკა, დახარჯავთ ამ 80 მლნ ლარს წელს თუ არ დახარჯავთ?", მიმართა ბაქრაძემ ბახტაძეს, რაზეც მთავრობის მეთაურმა აღნიშნა, რომ 80 მლნ დაიხარჯება იმისთვის, რომ დაგროვებითი საპენსიო რეფორმა მიმდინარე წელს დაიწყოს.