„მარგველაშვილი როგორც ჩანს, რეალურად იმყოფება წინასაარჩევნო სტრესის ქვეშ, სინამდვილეში პოლიტიკური კურიოზი არის ის, რომ თვითონ მარგველაშვილი ლაპარაკობს ამ თემაზე", – ასე უპასუხა „ქართული ოცნების“ ლიდერმა მამუკა მდინარაძემ გიორგი მარგველაშვილის განცხადებას იმის თაობაზე, რომ პოლიტიკური კურიოზია ის, რომ მმართველი გუნდი საპრეზიდენტო კანდიდატს ვერ ასახელებს.

„ჩვენ გვყავს არაერთი ღირსეული კანდიდატი, რომლებიდანაც შეიძლება დავასახელოთ ნებისმიერი, რომელიც იქნება უალტერნატივო და სწორედ ეს უალტერნატივობა აშინებს დღევანდელ პრეზიდენტს, რომელსაც ვერ გადაუწყვეტია, იყაროს თუ არა კენჭი მომდევნო საპრეზიდენტო არჩევნებში. ის  თვითონვე ამბობს, რომ ჯერ ელოდება ქართული ოცნების გადაწყვეტილებას და ამის შემდეგ გადაწყვეტს, იყაროს თუ არა კენჭი“ - აცხადებს მამუკა მდინარაძე.

საქართველოს პრეზიდენტი იმ მიზეზებს ხსნის, რის გამოც „ქართული ოცნება“ საპრეზიდენტო კანდიდატს „ვერ ასახელებს“. მარგველაშვილი ამას „პოლიტიკურ კურიოზად“ მიიჩნევს და დასძენს, რომ ამის მიზეზია ის, რასაც მმართველი გუნდი ბოლო 5 წლის განმავლობაში პრეზიდენტის ინსტიტუტის მიმართ დაკნინების მიზნით აკეთებდა.