პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა პეტრე დევრიშაძესთან დაკავშირებით „ევროპული საქართველოს" წევრის, გიგა ბოკერიას შეკითხვას შეკითხვითვე უპასუხა.

როგორც პარლამენტის პლენარულ სხდომაზე, სადაც მთავრობის ახალი შემადგენლობისა და სამთავრობო პროგრამისთვის ნდობის გამოცხადების საკითხს განიხილავენ, ირაკლი სესიაშვილმა განაცხადა, რომ დევრიშაძესთან დაკავშირებით ყოფილ ხელსუფლებას აქვს შეკითხვებზე პასუხი გასაცემი.

„ბ-მა გიგა ბოკერიამ მკითხა, რომ სად იყო კონტრდაზვერვა. მე მინდა აქეთ შევეკითხო ბატონ გიგა ბოკერიას, ბ-ნო გიგა გეკითხებით - თქვენ ხომ ძალიან ძლიერი მმართველობა გქონდათ, რომ 2008 წელს თქვენი მტკიცებით ადამიანმა დანაშაული ჩაიდინა. მხოლოდ 2010-ში მიუსაჯეთ მას ჯაშუშობის მუხლით შესაბამისი სასჯელი, მიუსაჯეთ 7 წელი.

მანამდე მასთან როგორც თანამშრომლობდით და მას აძლევდით საშუალებას, რომ მონაწილეობა მიეღო შესყიდვებში, ასევე, რამდენიმე მილიონი საჩუქარი მიიღეთ მაშინ, როდესაც ჯაშუშობა უკვე ჩადენილი ჰქონდა. 2 წელი დაგჭირდათ რომ დაგედგინათ, ჯაშუში იყო და ასეთი მშვენიერი, არაჩვეულებრივი ურთიერთობა გქონდათ, მაგრამ ყველაზე მთავარი კითხვა აქ ის არის, რომ - 7 წელი რომ მიუსაჯეთ ჯაშუშობის ბრალდებით, ჯაშუში ჩემთვის და მთელი ჩვენი საზოგადოებისთვის ძალიან სერიოზული ბრალდებაა, მით უმეტეს, როდესაც იმ ქვეყნის ჯაშუშია, რომელთანაც ომი გქონდა და რომელმა ქვეყანამაც შენი მოსახლეობა მოგიკლა. და ეს ჯაშუში ერთ წელიწადში გაუშვით. ეს ჯაშუში ერთ წელიწადში გამოუშვით ციხიდან. ასე რომ, პირველ რიგში, ამ კითხვებზე გაეცით პასუხი", მიმართა ირაკლი სესიაშვილმა გიგა ბოკერიას.