ფრაქცია „ნაციონალური მოძრაობის“ თავმჯდომარე „სერიოზულ აღმოჩენას“ აკეთებს და აცხადებს, რომ „თურმე ძალიან ვგავარ გენიალურ გერმანელ ფილოსოფოსს იმანუელ კანტს“, ოღონდ „არა გარეგნულად, არამედ იდეებით“.

გოცირიძემ პარლამენტის რიგგარეშე სხდომაზე სიტყვით გამოსვლისას, „ქართული ოცნების“ საკადრო პოლიტიკის გაკრიტიკების მიზნით კანტის სიტყვები მოიშველია და განაცხადა: „კანტმა ბრძანა - მე მუდამ მაოცებდა ორი რამ - ვარსკვლავებით მოჭედილი ცა და მორალური კანონები ჩემში. თურმე მეც ასე ვფიქრობდი, რომ ძალიან მაოცებდა ამ სამყაროში ორი რამ - მაღლა, მოჭედილი ცა და დაბლა, ბატონ ბიძინა ივანიშვილის საკადრო პოლიტიკა“.

გოცირიძემ აღნიშნა, რომ ივანიშვილმა „ქართუს“ საკადრო რეზერვები ამოწურა და ახალი კადრებით დაიწყო მთავრობის წევრების შევსება.

„დღევანდელი გამოსვლების მერე და მას შემდეგ რაც მოვისმინე მთავრობის პროგრამა, ვიზუალურად შევხედე მთავრობას, გავაკეთე სერიოზული აღმოჩენა. თურმე ძალიან ვგავარ გენიალურ გერმანელ ფილოსოფოსს, იმანუელ კანტს. გარეგნულად კი არა, მე და ბატონ იმანუელ კანტს გვაქვს ერთნაირი იდეები. კანტმა ბრძანა - მე მუდამ მაოცებდა ორი რამ: ვარსკვლავებით მოჭედილი ცა და მორალური კანონები ჩემში. თურმე მეც ასე ვფიქრობდი, რომ ძალიან მაოცებდა ამ სამყაროში ორი რამ - მაღლა, მოჭედილი ცა და დაბლა, ბატონ ბიძინა ივანიშვილის საკადრო პოლიტიკა. საიდან მოიყვანეთ ეს ხალხი?! აი როგორც ვარსკვლავები გამოანათებენ და ჩაქრებიან, ზოგი ბჟუტავს კიდეც, საიდანღაც გაჩნდებიან, მერე ისევ გაქრებიან. აი, ახლა ისევ ახალი გუნდი შემოვიდა და ყველას დაგვავიწყდა ისინი, ვინც იყვნენ. რომელი საკადრო პოლიტიკით ფორმირდება დღევანდელი ქართული მთავრობა?! ამოიწურა „ქართუს“ რეზერვები თუ რეზერვუარები და გაცდა „ქართუს“ არეალს თქვენი საკადრო პოლიტიკა და ახალი კადრებით შეივსო“, მიმართა რომან გოცირიძემ მმართველ გუნდს.