„ნაციონალური მოძრაობის“ პოლიტიკური საბჭოს თავმჯდომარე ნიკა მელია გავრცელებულ ინფორმაციას იმასთან დაკავშირებით, რომ საპრეზიდენტო არჩევნებზე „ქართული ოცნება“ მხარს პარლამენტის დამოუკიდებელი დეპუტატის, სალომე ზურაბიშვილის, კანდიდატურას დაუჭერს, იმის ხაზგასმად აფასებს, რომ მმართველი გუნდი არაფრის შეცვლას არ აპირებს.

„მთაწმინდის რაიონში ქალბატონი სალომე ზურაბიშვილის, როგორც დეპუტატის საქმიანობის მარგი ქმედების კოეფიციენტი არის ნულის ტოლი. უბრალოდ, არ არსებობს ეს ქალბატონი იმ რაიონში, რომელზეც უნდა ჰქონდეს მას პასუხისმგებლობა აღებული. ამ ქალბატონის წამოყენება პრეზიდენტობის კანდიდატად მკაფიო ხაზგასმა იქნება, რომ „ქართული ოცნება“ არც კი აპირებს რაიმეს შეცვლას, რაც არ არის გასაკვირი“, განაცხადა ნიკა მელიამ.