მოსკოვში, „ლუჟნიკების“ სტადიონზე, ხორვატიის და საფრანგეთის ეროვნულ ნაკრებ გუნდებს შორის მსოფლიო ჩემპიონატის ფინალური შეხვედრა ფრანგების გამარჯვებით, ანგარიშით 4:2 დასრულდა. 

ფრანგები პირველი ნახევრის მე-18 წუთზე დაწინაურდნენ. ხორვატების კარისკენ დარტყმულ ბურთს მანჯუკიჩი თავით შეეხო, მეკარემ მისი აღება ვერ შეძლო, რის შედგადაც ანგარიში 1:0 გახდა.

მალევე, 10 წუთში, მატჩის პირველი ნახევრის 29-ე წუთზე ხორვატიის ნაკრების ფეხბურთელმა, ივან პერიშიჩმა ბრწყინვალე გოლი გაიტანა და ანგარიში გაათანაბრა, თუმცა 37-ე წუთზე, მას შემდეგ, რაც გრიზმანის მიერ კუთხურიდან ჩაწოდებულ ბურთს ხორვატელი ფეხბურთელი ხელით შეეხო, მსაჯმა ვიდეოკადრების ნახვის მერე ხორვატების კარში 11-მეტრიანის დანიშვნის გადაწყვეტილება მიიღო.

ანტუან გრიზმანის მიერ შესრულებული პენალტი ზუსტი აღმოჩნდა და 38-ე წუთზე ანგარიში 2:1 გახდა. სწორედ ამ ანგარიშით დასრულდა თამაშის პირველი ნახევარი.

მატჩის მეორე ნახევარი გაცილებით მაღალ ტემპში დაიწყო. 59-ე წუთზე პოლ პოგბამ შესანიშნავი გოლი გაიტანა და ფრანგები ორქულიანი უპირატესობით დაწინაურდნენ - ანგარიში 3:1 გახდა.

65-ე წუთზე კი მბაპეს მიერ გატანილი გოლის წყალობით ფრანგები უკვე 3-ქულიანი სხვაობით გახდნენ ლიდერები.

მალევე, 69-ე წუთზე, მარიო მანჯუკიჩმა საფრანგეთის მეკარის დაუდევრობით ბურთის გატანა შეძლო და ანგარიში 4:2 გახდა.

4:2 - ამ ანგარიშით დასრულდა დღევანდელი მატჩი. საფრანგეთი 1998 წლის შემდეგ პირველად, ისტორიაში კი მეორედ, მსოფლიო ჩემპიონი გახდა.