ბიძინა ივანიშვილის საპრეზიდენტო არჩევნებში მონაწილეობას ნაკლებად სავარაუდოდ მიიჩნევს ექსპერტი სოსო ცისკარიშვილი. გაზეთ „რეზონანსთან“ საუბრისას იგი იმ ფაქტორებს ასახელებს, რის გამოც ივანიშვილისთვის პრეზიდენტობა სულაც არ არის მომხიბლავი, პირიქით, „ჯანმრთელობისთვის საფრთხის შემცველიც“ კია.

„ბიძინა ივანიშვილს, ვისაც მე ვიცნობ, ნამდვილად არ ექნება სურვილი, ჩაებას კონკურენციაში. რა უჭირს საიმისო ბატონ ბიძინას, რომ გახდეს პრეზიდენტი?! მე ვფიქრობ, რომ ეს არის უბრალოდ გზავნილი იმ ადამიანების მიმართ, საკუთარი თავის წარდგენა რომ უნდათ საპრეზიდენტო არჩევნებში; გადახედონ ბიძინა ივანიშვილის ავტორიტეტს, შესაძლებლობებს და ტყუილად არ დახარჯონ არც თანხები და არც ენერგია. ბიძინა ივანიშვილს ერთი წუთითაც რომ გაეფიქრებინა პრეზიდენტობა, ეს იქნებოდა ასახული იმ კონსტიტუციაში, რომელიც უნდა დახვდეს ახალ პრეზიდენტს, მაგრამ ყველაფერი, რაც პრეზიდენტის საქმიანობა იყო, უკვე ძირითადად „მიჭირხვნილია“. თანაც, ბიძინა ივანიშვილი არანაირ კრიტიკაზე ადეკვატური არ არის და ამიტომ პრეზიდენტობა მისი ჯანმრთელობისთვის საფრთხის შემცველია, სამსახურში სულაც რომ არ მივიდეს, მაინც ყველაფერს მას დააბრალებენ. ისე, გამორიცხული არაფერია, შეიძლება, არჩევნებამდე ორი დღით ადრე გადაწყვიტოს და გახდება კიდეც პრეზიდენტი, მაგრამ ორ კვირაში შეიძლება, გადაიფიქროს და ახალი საპრეზიდენტო არჩევნები დაინიშნოს“, აცხადებს სოსო ცისკარიშვილი.