უკრაინაში მრავალეროვნული საერთაშორისო საზღვაო, საჰაერო და სახმელეთო სწავლება „Sea Breeze 2018“-ის პირველი აქტიური ფაზა დასრულდა. სწავლების პირველი ფაზის დასრულება ქ.ოდესის ოფიცერთა სახლში სწავლების ხელმძღვანელმა პირებმა დადებითად შეაფასეს. ამ დროისთვის სწავლების ფარგლებში 135 -ი საბრძოლო გაფრენა და 20-ზე მეტი საზღვაო გასვლა განხორციელდა. ყოველწლიური მრავალეროვნული სწავლების მიზანს საზღვაო უსაფრთხოების უზრუნველყოფა, ასევე, შავი ზღვის აუზისა და პარტნიორი ქვეყნების სამხედრო-საზღვაო ძალებს შორის ურთიერთთანამშრომლობისა და კოორდინაციის გაუმჯობესება წარმოადგენს.

უკრაინის საზღვაო ძალების მეთაურმა მონაწილე ქვეყნებს მადლობა გადაუხადა და წარმომადგენლებს მათ შორის საქართველოდან სიმბოლური საჩუქრები გადასცა. ქ.ოდესაში აშშ-უკრაინულ სწავლებაში ნატოს წევრი და პარტნიორი, ასევე, შავი ზღვის აუზის ქვეყნების სამხედრო-საზღვაო ძალების წარმომადგენლები მონაწილეობენ. სწავლებაში ასევე ჩართულები არიან საქართველოს შეიარაღებული ძალების 50 სამხედრო მოსამსახურე. ქ. ოდესის რეგიონის საზღვაო აკვატორიაში მიმდინარე სწავლებაში საქართველოსთან ერთად მონაწილეობენ, დანიის, ბულგარეთის, დიდი ბრიტანეთის, საბერძნეთის, თურქეთის, კანადის, ესტონეთის, მოლდავეთის, ლიტვის, ნორვეგიის, შვედეთის, პოლონეთის, რუმინეთის შეიარაღებული ძალების მცურავი საშუალებები, საზღვაო ავიაცია, საბრძოლო მყვინთავები და საზღვაო ქვეითი ქვედანაყოფები.

სწავლების მიმდინარეობის ფარგლებში ქართველი სამხედრო მოსამსახურეები ცოდნას აიმაღლებენ ოპერაციების მართვისა და ინფორმაციის გაცვლის შესაძლებლობებში, ასევე მიიღებენ გამოცდილებას როგორც წყალზედა, წყალქვეშა, ნაღმსაწინააღმდეგო, ამფიბიური და ჰაერსაწინააღმდეგო მოქმედებების მიმართულებებით.

უკრაინაში მრავალეროვნული საერთაშორისო საზღვაო სწავლება „Sea Breeze 2018“ დღეს ოფიციალურად გაიხსნა და ის 22 ივლისამდე გაგრძელდება.

ინფორმაციას საქართველოს თავდაცვის სამინისტროს პრესსამსახური ავრცელებს.