ხორავას ქუჩაზე მომხდარი მკვლელობის საქმის შემსწავლელმა პარლამენტის დროებითმა საგამოძიებო კომისიამ მეთერთმეტე სხდომა გამართა.

კომისიის წევრებმა დღევანდელ სხდომაზე მოწმე ნიკოლოზ იორდანიშვილის და სსიპ ლევან სამხარაულის სახელობის სასამართლო ექსპერტიზის ეროვნული ბიუროს ექსპერტ ნინო კვიწინაძის ოფიციალური ახსნა-განმარტებები მოისმინეს.

გამოკითხვის დროს, კომისიის წევრმა ხათუნა გოგორიშვილმა, წითელი ავტომობილის მძღოლი ნიკოლოზ იორდანიშვილი, რომელიც ხორავას ქუჩაზე მკვლელობის დროს იმყოფებოდა, ტყუილის თქმაში დაადანაშაულა.

„ტყუილს ამბობთ, რაც აქ ზიხართ ბატონო ნიკოლოზ. ტყუილს, ერთი მარტივი მიზეზის გამო შემიძლია გითხრათ, რომ ამბობთ. პირველი, რომ ძალიან ბევრ რაღაცაზე ამბობთ, რომ არ მახსოვს, მაგრამ იმავდროულად, გახსოვთ, რომ ეს იყო 18 დეკემბერი, ნიკოლოზობა თენდებოდა, ვის ოფისში მიდიოდით. ადამიანს მეხსიერება ან აქვს დეტალური, ან არ აქვს. არ შეიძლება, რომ რაღაცებზე ქონდეს, რაღაცებზე არ ქონდეს. კიდევ ერთი ტყუილი, რომელიც ახლავე შემიძლია დაგიფიქსიროთ. თქვენ თავიდან იძახდით, მანქანაში რომ იჯექით, არაფერი გაგიგიათ, არანაირი ხმაური, და მერე გვეუბნებით, რომ 112-ში იმიტომ არ დარეკეთ, რომ წივილ-კივილი უკვე ატეხილი იყო მეზობლების,“ მიმართა ხათუნა გოგორიშვილმა მოწმეს.

პარლამენტის დროებითი საგამოძიებო კომისია დღესვე არასრულწლოვნების გამოკითხვას ჩაატარებს.

კომისიის შემდეგ სხდომაზე, რომელიც 23 ივნისს გაიმართება, პროკურატურის წარმომადგენლები იქნებიან მოწვეული.