ისრაელის პარლამენტმა კანონი მიიღო, რომლის მიხედვითაც ისრაელი ექსკლუზიურად ებრაული სახელმწიფოა.

„ებრაელი ერის სახელმწიფოს“ კანონი არაბულ ენას სახელმწიფო ენის სტატუსს ართმევს და აცხადებს, რომ ებრაული დასახლებების განვითარება ისრაელის ეროვნულ ინტერესს წარმოადგენს, იტყობინება BBC.

კანონში ასევე წერია, რომ „მთელი და ერთიანი“ იერუსალიმი ისრაელის დედაქალაქია.

ისრაელის პარლამენტის არაბმა წევრებმა დაგმეს ეს კანონი თუმცა, ისრაელის პრემიერ მინისტრმა, ბინიამინ ნეთანიაჰუმ ეს „გარდამტეხ მომენტად“ შეაფასა.

ახალი კანონის მიხედვით, რომელსაც მხარს ქვეყნის მემარჯვენე მთავრობა უჭერს, „ისრაელი ებრაელი ხალხის  ისტორიული სამშობლოა და მათ აქვთ ამ სახელმწიფოში თვითგამორკვევის ექსკლუზიური უფლება“.

ქნესეთში კანონპროექტის შესახებ მსჯელობა რვა საათზე მეტხანს გაგრძელდა. სხდომა საკმაოდ დაძაბული აღმოჩნდა, კანონპროექტს მხარი 62-მა დეპუტატმა დაუჭირა, წინააღმდეგი კი 55 იყო.

თუმცა, პრეზიდენტისა და გენერალური პროკურორის მოთხოვნით, კანონპროექტში ზოგიერთი მუხლი შეიცვალა. მათ შორის, ის პუნქტი, რომელიც მხარს დაუჭერდა მხოლოდ ებრაელებისგან შემდგარი თემების ჩამოყალიბებას.

ისრაელის სახელმწიფოს დაახლოებით 9 მილიონი მცხოვრებიდან 20% არაბია.

კონსტიტუციით, არაბებსა და ებრაელებს თანაბარი უფლებები აქვთ. მიუხედავად ამისა, როგორც არაბები ჩივიან, მათ ისე ეპყრობიან, როგორც მეორე კლასის მოქალაქეებს. ისინი დისკრიმინაციის მსხვერპლნი ხშირად ხდებიან. მათ არ აქვთ უზრუნველყოფილი ჯანმრთელობა, განათლება და  ცხოვრების პირობები იმ დონეზე, როგორც ებრაელებს.

ისრაელის პარლამენტის ერთ-ერთმა არაბმა წევრმა, აჰმედ ტიბიმ განაცხადა, რომ ამ კანონპროექტის დამტკიცება „დემოკრატიის სიკვდილის“ ტოლფასია.

არაბული უფლებადაცვითი არასამთავრობო ორგანიზაციის წარმომადგენლის, ადალაჰის თქმით, კანონი არის იმის მცდელობა რომ განავითარონ „ეთნიკური უპირატესობა რასისტული პოლიტიკის მხარდაჭერით“.

გასულ კვირას ნეთანიაჰუმ დაიცვა კანონპროექტი და განაცხადა: „ჩვენ მხარს დავუჭერთ ისრაელის სახელმწიფოში სამოქალაქო უფლებებს და დემოკრატიას, თუმცა უმრავლესობასაც აქვს უფლებები და სწორედ უმრავლესობა გადაწყვეტს“.