ხორავას ქუჩაზე მომხდარი მკვლელობის საქმის საგამოძიებო კომისიის წევრები წინასწარ პატიმრობაში მყოფ მირზა სუბელიანისა და თენგიზ კალანდიას დაკითხავენ.

გამოძიება სუბელიანს დანაშაულის შეუტყობინებლობას, კალანდიას კი დანაშაულის დაფარვას ედავება. 

ფრაქცია „ქართული ოცნების“ წევრმა, ანრი ოხნაშვილმა გლდანის ციხეში შესვლამდე განაცხადა, რომ სუბელიანს და კალანდიას ყველა იმ შეკითხვას დაუსვამენ რაც საზოგადოებაში გაჟღერდა.

„ჩვენ დავსვამთ ყველა იმ შეკითხვას, რომელიც საზოგადოებაში გაჟღერდა და საზოგადოების დიდი ინტერესი გამოიწვია - დაწყებული იქიდან, თუ რა განახორციელა თენგიზ კალანდიამ, კონკრეტულად და ჰქონდა თუ არა მას რაიმე საუბარი მირზა სუბელიანთან. რაც შეეხება მირზა სუბელიანს, მასთან დავსვამთ ყველა იმ შეკითხვას, რომელიც საზოგადოებაში გაჟღერდა. ხომ არ გამოიყენა მან რაიმე ფორმით მისი სამსახურებრივი მდგომარეობა, მიუხედავად იმისა, რომ მან მალევე დატოვა თავისი თანამდებობა და ხომ არ ჰქონდა ვინმესთან მას კომუნიკაცია რაიმე ფორმით“,  განაცხადა ანრი ოხანაშვილმა.

„ევროპული საქართველოს“  წევრი ირაკლი აბესაძე აცხადებს, რომ მირზა სუბელიანთან ძალიან ბევრი და დეტალური კითხვები ექნებათ, მათ შორის ის, ხომ არ ყოფილა გამოყენებული მისი თანამდებობრივი მდგომარეობა იმისათვის, რომ გამოძიება არათანმიმდევრულად წარმართულიყო.

„შეკითხვების დიდი ნაწილი მიმართული იქნება ბატონი მირზა სუბელიანისადმი. რამდენად ერეოდა ის გამოძიებაში, რამდენად ხდებოდა გამოძიების წარმართვა ტენდენციურად, იმის გამო, რომ მისი ოჯახის წევრები იყვნენ მონაწილეები და ფიგურანტები ამ ტრაგიკული შემთხვევის“,  განაცხადა ირაკლი აბესაძემ.