ექსპერტი სანდრო თვალჭრელიძე მიიჩნევს, რომ საქართველოს მოქმედ პრეზიდენტს, გიორგი მარგველაშვილს 2018 წლის საპრეზიდენტო არჩევნებში „აუცილებლად ექნება გამარჯვების შანსი, თუ „ქართული ოცნება“ მართლაც სალომე ზურაბიშვილს დაუჭერს მხარს“, ხოლო „ნაციონალური მოძრაობისა“ და კიდევ მასთან მდგომი სხვა პარტიების საერთო კანდიდატს, გრიგოლ ვაშაძეს გამარჯვების შანსი არ აქვს.

აღნიშნულის შესახებ ექსპერტმა გაზეთ „კვირის პალიტრას“ განუცხადა.

„როდესაც კონსტიტუციური უმრავლესობა არსებობს და ქვეყნის მართვა ერთი ძალის ხელშია, არის დიდი საფრთხე, რომ მათ ავტორიტარიზმისკენ გაექცეთ ხელი, მით უფრო, რომ ორი ვადით ხელისუფლებაში ყოფნის შემდეგ უფრო დიდხანს დარჩენის სურვილი მძაფრდება ხოლმე. თუ „ოცნება“ ავტორიტარიზმის გზას დაადგა, მაშინ ნამდვილად დასჭირდება კეზერაშვილის მსგავსი და მასზე უარესი ხალხი, ვინც ყველაფერზე იქნება წამსვლელი. ამ დროს საზოგადოების კონტროლი განსაკუთრებით მნიშვნელოვანი ხდება... „ქართულმა ოცნებამ“ როგორმე დასკვნები უნდა გამოიტანოს. ჩემი აზრით, ლაკმუსის ქაღალდი იქნება საპრეზიდენტო არჩევნები. ვნახოთ, ვის დაასახელებს მმართველი ძალა კანდიდატად“, აცხადებს ექსპერტი და შეკითხვაზე - „პრეზიდენტ მარგველაშვილის თქმით, „ქართული ოცნება“ ელოდება მის გადაწყვეტილებას არჩევნებში მონაწილეობის თაობაზე და ამიტომ აჯანჯლებს საკუთარი კანდიდატის დასახელებას...“, - პასუხობს:

„გამიჭირდება იმის თქმა, ვინ ვის ელოდება, თუმცა, ვფიქრობ, მარგველაშვილი სწორად იქცევა, საბოლოო გადაწყვეტილებას ჯერ რომ არ ამხელს. მას აუცილებლად ექნება გამარჯვების შანსი, თუ „ქართული ოცნება“ მართლაც სალომე ზურაბიშვილს დაუჭერს მხარს. ჩემი აზრით, ამ შემთხვევაში მმართველი ძალა არჩევნებს წააგებს. მოგეხსენებათ, „ნაციონალურმა მოძრაობამ“ და კიდევ რვა პარტიამ დაასახელა კანდიდატად გრიგოლ ვაშაძე. ვფიქრობ, რა შესაძლებლობაც ჰქონდათ, საუკეთესო კანდიდატი შეარჩიეს, თუმცა მას შანსი არ აქვს... ნამდვილად განათლებული და გაწონასწორებული ადამიანია, ასევე პლუსია ისიც, რომ ნინო ანანიაშვილის მეუღლეა... ერთი კია - ცოტა უცნაურია, როდესაც ზოგიერთი ამბობს, რომ ვაშაძის გვერდით მისი დასავლური ორიენტაციის გამო დგას და ეს მაშინ, როცა ამ „დასავლური კურსის მიმდევარმა“ ადამიანმა ცხოვრების დიდი ნაწილი მოსკოვში გაატარა“.