ლეიბორისტული პარტიის ლიდერმა, შალვა ნათელაშვილმა ბრიფინგი გამართა. ნათელაშვილი პრეზიდენტს და პრემიერ მინისტრს მოუწოდებს, რომ საპრეზიდენტო არჩევნები 31 ოქტომბერს დაინიშნოს. ლეიბორისტული პარტიის ლიდერის თქმით, სხვა შემთხვევაში არჩევნების ტოტალური გაყალბება მოხდება, რადგან სხვა თარიღით ნახევარი მილიონი ადამიანი არჩევნებზე ვერ მოვა.

„მოგეხსენებათ, შემოდგომაზე ხალხი უკანასკნელად აირჩევს ქვეყნის პრეზიდენტს. დაწყებულია ჭეშმარიტად ისტორიული პროცესი, რომელიც უნდა დამთავრდეს ქვეყნის გამარჯვებით ან ივინშვილ - ბანკირთა დინასტიური მმართველობით, მრავალი წლის მანძილზე, რასაც იმედია აღარ დაუშვებთ.

მმართველი ელიტა ყველანაირად ცდილობს ჩამოაცილოს ხალხი, მასობრივად, საარჩევნო პროცესს, ამისათვის არჩევნებს ნიშნავენ, როგორც წესი, ოქტომბრის შუალედში შაბათ-კვირას, როდესაც ხალხი გასულია მინდორ-ველებში ლუკმა პურის საშოვნელად, ახალი დაწყებულია სწავლის პროცესი სკოლებში, ინსტიტუტებში და ოპოზიციაც ვერ ასწრებს თავისი მწირი რესურსებით, შესაბამის ორგანიზებას, სამაგიეროდ ყველაფერს ასწრებს სახელმწიფო გამყალბებელთა ბანდა, რომლებიც აკეთებენ უბნების უზურპაციას მიჰყავთ 15 ლარიანები და დადებენ შესაბამის შედეგებს.

მე ვაფრთხილებ ქვეყნის პრეზიდენტს და პრემიერ მინისტრს, საპრეზიდენტო არჩევნები დანიშნეთ მიმდინარე წლის 31 ოქტომბერს, ოთხშაბათს ან ხალხი და მსოფლიო თანამეგობრობა ჩათვლის, რომ თქვენ უკვე იწყებთ არჩვენების გლობალურ, ტოტალურ გაყალბებას, რასაც უკვე არავინ გაპატიებთ.

სწორედ ახლად დაწყებული მოსავლის აღება, სასწავლო პროცესი, რთველი და ის სიცხე, რომელიც ოქტომბრის შუა რიცხვებამდე ხშირად გრძელდება, ამის გამო ნახევარი მილიონი კაცი არ მოვა არჩევნებზე და ხშირად ერთი ბიულეტენიც კი წყვეტს ქვეყნის ბედს“, განაცხადა შალვა ნათელაშვილმა.