პარლამენტის იურიდიულ საკითხთა კომიტეტის თავმჯდომარემ, ეკა ბესელიამ განაცხადა, რომ „ქართული ოცნების“ მიერ საპრეზიდენტო კანდიდატად ბიძინა ივანიშვილის წარდგენას, „რა თქმა უნდა, მხარს დაუჭერდა“, თუმცა ბესელია ამ ეტაპზე არც მმართველი პარტიის კანდიდატის ვინაობას ასახელებს და არც მისი წარდგენის დროს აკონკრეტებს.

„არ ვაგვიანებთ საპრეზიდენტო კანდიდატის დასახელებას, არც პრეზიდენტს ველოდებით, ჩვენ ვთათბირობთ და ვფიქრობ, მოკლე დროში, მალე მოხდება ჩვენი პოზიციის გახმოვანება. როცა ამ საკითხზე განმარტებებს ვაკეთებდით, მუდმივად ხაზგასმა ხდებოდა, რომ საერთო პოზიციის შეჯერება ხდება. თუმცა, მოკლე დროში მოხდება ამ გადაწყვეტილების გასაჯაროვება. ეს არ უკავშირდება იმას, პრეზიდენტი რა გადაწყვეტილებას მიიღებს. ვინ იქნება კანდიდატი ამაზე არ დავკონკრეტდები“, განაცხადა ეკა ბესელიამ ჟურნალისტებთან საუბრისას და შეკითხვაზე - დაუჭერდით თუ არა მხარს ბიძინა ივანიშვილს საპრეზიდენტო კანდიდატად? - უპასუხა: „რა თქმა უნდა, დავუჭერდი“.