ცენტრალური ბიუჯეტიდან 270 მილიონი გამოიყოფა იმისათვის, რომ 2019 წლის ბოლომდე მთლიანად იყოს ჩანაცვლებული თბილისში დღეს არსებული ავტობუსების პარკი და ე.წ. ყვითელი ავტობუსები მთლიანად იქნება ჩანაცვლებული ახალი ავტობუსებით, ამასთან ავტობუსების რაოდენობა 900 ერთეულამდე გაიზრდება.

აღნიშნულის შესახებ დედაქალაქის მერის მოადგილემ, ირაკლი ხმალაძემ თბილისის სატრანსპორტო პოლიტიკის კონცეფციის პრეზენტაციაზე განაცხადა, რომელსაც მთავრობის მეთაური, მამუკა ბახტაძეც ესწრებოდა.

ხმალაძის თქმით, მოხდება საავტობუსო ხაზების გაფართოება, მიკროავტობუსები მნიშვნელოვნად შემცირდება და ისინი შესაძლოა მხოლოდ იმ ადგილებში დარჩნენ, სადაც დიდი ზომის ავტობუსების გადაადგილება ვიწრო გზების გამო, არ ხერხდება.

ირაკლი ხმალაძემ აღნიშნა, რომ დედაქალაქის მთავარი პრობლემა კერძო სატრანსპორტო საშუალებების დიდი რაოდენობაა. მისი თქმით, საზოგადოებრივი ტრანსპორტის მოხმარება მკვეთრად შემცირდა, რადგან თბილისში ნახევარ მილიონზე მეტი კერძო სატრანსპორტო საშუალებაა დარეგისტრირებული. თბილისის მერის მოადგილემ აღნიშნა, რომ საზოგადოებრივი ტრანსპორტის მოხმარების მაჩვენებელი უნდა გაიზარდოს კერძო სატრანსპორტო საშუალებების კლების ხარჯზე.

ავტობუსების განვითარებასთან ერთად მოხდება მეტროპოლიტენის განვითარებაც. მეტროს 2019 წლიდან ყოველ მომდევნო წელს 4 ახალი შემადგენლობა დაემატება. მოხდება ტაქსების რეგულაცია. საკანონმდებლო ცვლილელება მიღებულია პარალმენტის მიერ და აგვისტოდან დაიწყება ნებართვების გაცემა, ხოლო 2018 წლის ოქტომბრიდან დედაქალაქში ყველა ტაქსი ლიცენზირების საფუძველზე იმოძრავებს.

ირაკლი ხმალაძემ ასევე თქვა, რომ პარკირებაში იქნება ცვლილებები და ზონალურ-საათობრივი პარკირების საფუძველზე დაწესდება ზონალური გადასახადები, განსაკუთრებით იმ ადგილებში, სადაც პარკირებაზე ყველაზე დიდი მოთხოვნაა.

დედაქალაქის მერია ასევე აპირებს, რომ ეტაპობრივად მოხდეს მარჯვენა საჭიანი, ორკარიანი და განსხვავებული ფერის ტაქსის მანქანების მოძრაობის აკრძალვა.