საქართველოს ფინანსთა მინისტრის, ნოდარ ხადურის განცხადებით, ამ დროისთვის სახელმწფიო ხაზინაში ანგარიშზე და კომერციული ბანკების ანგარიშზე მობილიზებულია 4 მილიონ 200 ათას ლარზე მეტი. ამის შესახებ ნოდარ ხადურმა გუშინ საღამოს, მთავრობის ადმინისტრაციაში, საგანგებო შტაბის სხდომაზე განაცხადა.


მისი თქმით, ეს არის სრულად შემოწირულობები, მათ შორის კერძო და ფიზიკური პირებისგან შემოწირულობა არის მილიონ 700 ათასი ლარი, 31 ათასი დოლარი და ათასი ევრო.


"სახელმწიფო ბიუჯეტმა უკვე გამოყო 10 მილიონი ლარი მთავრობის განკარგულებით რეგიონების ფონდიდან, რომელიც უკვე ჩაერიცხა მერიას. კვირასვე განხორციელდა ეს ტრანზაქცია. პრეზიდენტის სარეზერვო ფონდიდან გამოიყო 200 ათასი ლარი. მთავრობის სარეზერვო ფონდიდან გარდაცვლილთა ოჯახების დახმარებისთვის გამოიყო ამ ეტაპზე 150 ათასი ლარი. ყველა ოჯახი ხვალვე მიიღებს ამ დახმარებას მას მერე, რაც ადგილობრივი თვითმმართველობისგან მივიღებთ მათ ზუსტ კოორდინატებს", - განაცხადა გუშინ ხადურმა.


მისივე თქმით, რაც შეეხება დონორებს, 2 დღის განმავლობაში ფინანსთა სამინისტრო, ქალაქის მერიასთან ერთად აქტიურად მუშაობდა დონორებთან.


"ელჩებსაც და საფინანსო ინსტიტუტებსაც ჩვენ ვთხოვეთ, რომ დახმარების დიდი ნაწილი ჩვენ გვინდა იყოს ფინანსური დახმარება, ვინაიდან ამ ეტაპზე ეს ყველაზე მნიშვნელოვანია, თუმცა იქიდან არის შემოთავაზება როგორც ტექნიკის, ისე ინტელექტუალური დახმარება, ტექნიკური დახმარება, ექსპერტები და ა.შ.", - განაცხადა ხადურმა.