მეუფე გრიგოლი TV პირველის გადაცემა „რეაქციაში“ აცხადებს, რომ პატრიარქისთვის იყო შეთავაზება, რომ გადამდგარიყო, თუმცა უწმინდესმა ამაზე უარი განაცხადა. მეუფე აკონკრეტებს, რომ ეს შეთავაზება სასულიერო პირებისგან არ ყოფილა, ფაქტს კი, პატრიარქის მოსაყდრის დანიშვნის შემდეგ ჰქონდა ადგილი.

„იყო მცდელობა, რომ პატრიარქი გადამდგარიყო, იყო ესეთი შეთავაზებაც, მაგრამ დიდება და მადლობა ღმერთს, რომ პატრიარქი ამაზე არ წავიდა. პატრიარქი ვიდრე არის ამ ქვეყანაზე, ის უნდა იყოს საჭესთან. ვიდრე მას ძალუძს ეკლესიის მართვა, ამაზე საუბარიც კი არ შეიძლება. მე ვფიქრობ ეს არის ძალიან მნიშვნელოვანი თემა. მისსავე სიცოცხლეში ცდილობს ვიღაც, თავისთვის სასურველი გეგმა განახორციელოს და ამაში მოხდეს იმ საშუალებების გამოყენება, რომელიც გაუადვილებს გარკვეულ ძალებს იმ გეგმების განხორცილებას. დღეს, როგორც არასდროს, ძალიან მნიშვნელოვანია რა მდგომარეობაში იქნება ეკლესია. ჩემთვის მაგალითად მნიშვნელოვანი იმდენად არ არის ის დავუშვათ ვინ იქნება ხვალ, არამედ მნიშვნელოვანი არის რა პოზიციები და ღირებულებები იქნება წინა პლანზე საქართველოს ეკლესიის დღის წესრიგში აქტუალური და რა მიმართულებით განვითარდება ეკლესია.

პატრიარქისთვის გადადგომა არ შეუთავაზებიათ სასულიერო პირებს. მას უთხრეს  „თქვენო უწმინდესობავ დაიღალეთ და ჩვენ ყველაფერს მივხედავთ!“ მე ვფიქრობ, ეს საკმაო საფუძველს იძლევა იმისა, რომ თუნდაც მე ვიყო ჩემს პოზიციაზე, რომელზეც ვარ და პატრიარქი კიდევ ბევრი წელი მენახოს ეკლესიის საჭესთან და არა იმ გადაწყვეტილების ჭრილში, რომელზეც ახლახან მოგახსენეთ. ეს მოხდა მოსაყდრის დანიშვნის შემდგომ“, განაცხადა მეუფე გრიგოლმა, რომელმაც დამატებითი განმარტებებისაგან თავი შეიკავა და არ დააკონკრეტა იყვნენ თუ არა პატრიარქთან გადადგომის მოთხოვნით მისული ხელისუფლების წარმომადგენლები.