პრემიერ მინისტრმა მამუკა ბახტაძემ პროკურატურაში ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისება-გაფლანგვის ფაქტებზე ყოფილი მინისტრების - დიმიტრი ქუმსიშვილის და ზურაბ ალავიძის გამოკითხვის შემდეგ მისი წინამორბედის, გიორგი კვირიკაშვილის გამოკითხვის შესაძლებლობაც „ბუნებრივ მომენტად“ შეაფასა და თქვა, რომ „კითხვებზე უნდა გაეცეს პასუხი“ და „არ აქვს მნიშვნელობა, ადამიანი რა პოზიციაზეა“.

„მე ვფიქრობ, რომ საგამოძიებო ორგანოებმა გააკეთეს ძალიან პირდაპირი დასწორი განმარტება და მეც მინდა კიდევ ერთხელ გავიმეორო. როდესაც არსებობს კითხვები, ამ კითხვებზე უნდა გაეცეს პასუხი, არ აქვს მნიშვნელობა, ადამიანი რა პოზიციაზეა. ეს მეც მეხება, ჩემს ნებისმიერ კოლეგას, რომელიც დღეს ჩემს გვერდით არის, ან ყოფილ კოლეგას, ეს არის ძალიან ბუნებრივი მომენტი და მე ვფიქრობ, რომ ამ თემების გარშემო ზოგადად კითხვის ნიშნების არსებობა არ არის სწორი“, განაცხადა მამუკა ბახტაძემ.