ხალხის პრობლემების გასაცნობად და მოსაგვარებლად მუნიციპალიტეტის მერი ბონდო სოფრომაძე და საკრებულოს თავმჯდომარე ნინო ჯანელიძე ამჯერად ძევრის ადმინისტრაციული ერთეულის მოსახლეობას შეხვდნენ. შეხვედრაში ასევე მონაწილეობდნენ მერის პირველი მოადგილე მანუჩარ ფანჩულიძე, მერიის ჯანდაცვისა და სოციალურ საკითხთა სამსახურის უფროსი დიანა ფოცხვერაშვილი, ინფრასტრუქტურის სამსახურის ხელმძღვანელი ვახტანგ იამანიძე, მერის თანაშემწე გიორგი ამირანაშვილი, საკრებულოს თავმჯდომარის მოადგილე ნოდარ ფანჩულიძე, მერის წარმომადგენელი ძევრის ადმინისტრაციულ ერთეულში ფრიდონ კუტალაძე ასისტენტებთან ერთად და (ა)იპ დასუფთავებისა და კეთილმოწყობის მუნიციპალური ცენტრის ხელმძღვანელი ტარიელ ფანჩულიძე.


მოსახლეობამ მუნიციპალიტეტის ხელმძღვანელი პირებისაგან როგორც პირადი, ასევე უბნისა და სოფლის პრობლემების მოგვარება მოითხოვა. პრიორიტეტულ პრობლემებად მოსახლეობამ საგზაო ინფრასტრუქტურის მოწესრიგება, სასმელი წყლის რეზერვუარების მოწყობა და სეფარეთის თემის გაზიფიცირება დაასახელა. ასევე დაისვა სოფლის ცენტრალური მონაკვეთის გარე განათებით უზრუნველყოფის საკითხი. ყველა დასმული საკითხი შესაბამისი სამსახურების მიერ იქნა ჩანიშნული რეაგირებისათვის.


„მეგობრებო, წინასაარჩევნო შეხვედრების დროს მე თქვენ დაგპირდით, რომ ვიქნებოდი თქვენს გვერდით 24 საათის განმავლობაში, გავიზიარებდი თითოეული ოჯახის ჭირსა და ლხინს. თქვენ მე დიდი ნდობა გამომიცხადეთ და მომანიჭეთ მერის მანდატი. ამ შეხვედრებით კი გაბარებთ ანგარიშს, თუ რისი გაკეთება შევძელი და რა მიზნები მაქვს დასახული. შემახსენეთ დანაპირები, მომიყევით თქვენი პრობლემები, რადგან ჩემთვის მნიშვნელოვანია არა გაკეთებული, არამედ გაუკეთებელი საქმეები. ძალ-ღონეს არ ვიშურებ იმისათვის, რომ ჩემი დევიზი, რითაც მოვედი ხელისუფლებაში „ხალხთან ახლოს, ხალხის სამსახურში“ - შევასრულო. რა თქმა უნდა, არის ხარვეზები, ჩვენ უნდა გავაკეთო მეტი. მოითხოვეთ, იქონიეთ თანამდებობის პირებთან პირდაპირი კონტაქტი. დავგეგმოთ და გავაკეთოთ ერთად, რადგან როგორც მე, მუნიციპალიტეტის მერს, ისე მერიის ყველა თანამშრომელს გათვითცნობიერებული გვაქვს, რომ ხელისუფლება უნდა ემსახუროს ხალხს და არა პირიქით“, მიმართა ადგილობრივ მოსახლეობას ბონდო სოფრომაძემ.


სიტყვით გამოვიდა ასევე მერის პირველი მოადგილე მანუჩარ ფანჩულიძე, რომელმაც, როგორც ყოფილმა სოფლის მაჟორიტარმა დეპუტატმა და საჯარო სკოლის დირექტორმა, ცალკეული უბნების პრობლემებზე და მათი მოგვარების რეალურ გზებზე ისაუბრა.


თერჯოლის მუნიციპალიტეტის მერი ბონდო სოფრომაძე ხალხის პრობლემების გასაცნობად და მოსაგვარებლად მერიის სამსახურის უფროსებთან ერთად ეტაპობრივად ყველა სოფელში შევა და შეხვდება მოსახლეობას, რათა ადგილზე იქნას განხილული ყველა პრობლემა, რაც აწუხებს სოფლის მაცხოვრებლებს და იქვე, ხალხთან ერთად დაისახოს პრობლემის მოგვარების გზები.

ინფორმაციას თერჯოლის მუნიციპალიტეტის მერიის პრესსამსახური ავრცელებს.