ხაშში ადგილობრივებმა გზა გახსნეს. გუშინ, 26 ივლისს ზემო სვანეთის სოფელებში ჭუბერსა და ხაიშში ფინანსთა სამინისტროს საგამოძიებო სამსახური შევიდა, მიზანი ხე-ტყის უკანონო ჭრის ფაქტების შესწავლა იყო, თუმცა მათ მოსახლეობამ ჩხრეკის უფლება არ მისცა, რასაც დაპირისპირება მოჰყვა. დაპირისპირების შედეგად ადგილობრივებმა გზა გადაკეტეს, თუმცა 3 საათიანი  მოლაპარაკების შედეგად, გუშინ ღამით გზა გაიხსნა.

ადგილობრივებთან მოლაპარაკებას მთავრობის ადმინისტრაციის  რეგიონული განვითარების სამსახურის უფროსი სოზარ სუბარიც ესწრებოდა. გზის გახსნის შემდეგ სუბარმა კომენტარი გააკეთა მოლაპარაკებასთან დაკავშირებით. მისი თქმით, შეთანხმება შედგა, გზა გაიხსნა და სპეცრაზმმაც დატოვა სვანეთი.

„გზა გაიხსნა, ამ წუთისთვის მთავარი სიახლე ალბათ ეს არის. მთელი დღის განმავლობაში დაძაბული იყო ვითარება. ძალიან ხშირად, ვიტყოდი, რომ კანონის ზღვარზე გადიოდა მოსახლეობის ნაწილი და ზოგჯერ, ზოგიერთ შემთხვევასთან დაკავშირებით ეს შეიძლება ძალიან რბილი ნათქვამიც იყოს, თუმცა მთლიანობაში მაინც მივიღეთ გადაწყვეტილება, რომ მოლაპარაკებები გაგვეგრძელებინა, რადგან ამ რამდენიმე სოფლის მოსახლეობისთვის, რომელიც არის მესტიის რაიონის ქვედა თემში, შემოსავლის ერთადერთი წყარო არის ხე-ტყე. ძალიან კარგად ვიცი, რომ უკანონო საქმიანობა არ უნდა იქნას დაშვებული, თუმცა ძალიან ხშირ შემთხვევაში, სახელმწიფოს მხრიდანაც ვერ მოხერხდა ისეთი ნაბიჯების გადადგმა, რომ მომხდარიყო ამ საქმიანობის კანონის ფარგლებში, ლეგალურ ჩარჩოებში მოქცევა. შეთანხმება არის ასეთი – გზა გაიხსნა, მანქანები დაიძრნენ სპეცრაზმიც თავისთავად გავიდა“, განაცხადა სოზარ სუბარმა.