საქართველოს გარემოს დაცვის და სოფლის მეურნეობის მინისტრმა, ლევან დავითაშვილმა „ქრონიკის“ ეთერში ზემო სვანეთში არსებულ მდგომარეობაზე ისაუბრა. დავითაშვილის თქმით, ტყის რესურსების გამოყენება მდგრადი მოპოვების გზით უნდა ხდებოდეს, ისე რომ არ ირღვეოდეს ტყის ეკოლოგიური ფუნქცია და ტყეს თუ არ გავუფრთხილდებით, ტურიზმიც ვერ განვითარდება.

„ჩვენც და პრემიერ მინისტრმაც განაცხადა, რომ მნიშვნელოვანი არის ეკოლოგიური მიმართულებები და ჩვენი ხელისუფლების ერთ-ერთი პრიორიტეტი სწორედ ტყის დაცვა და შენარჩუნება გახლავთ. ამიტომ ამ ნაწილში ნებისმიერი სახელმწიფოებრივი სამსახური იქნება პრინციპული, რომ დაიცვას პოზიციები და აღასრულოს კანონი. ერთი მხარე, ეს არის ფინანსთა სამინისტროს საგამოძიებო სამსახური, ზოგადად ნებისმიერი აღმასრულებელი ხელისუფლების ნებისმიერი სტრუქტურა ამ კუთხით იქნება ძალიან პრინციპული, თუმცა მეორე მხარეა, სიუჟეტებშიც მოვისმინეთ, რომ მოსახლეობას სჭირდება შემოსავლის საშუალება, რეგიონის  ეკონომიკის განვითარება, ზოგადად ესეც ჩვენი პრიორიტეტია და ესეც გვესმის, მაგრამ როდესაც ვსაუბრობთ ხე-ტყის მოპოვებაზე და გამოყენებაზე, აქ საუბარი უნდა იყოს სწორად მოპოვებაზე და ეკოლოგიური ფუნქციის შენარჩუნებაზე და ხშირ შემთხვევაში იჭრება ის, რაც არ უნდა მოიჭრას. საუბარი იმაზეა, რომ ჩვენ როცა ვსაუბრობთ ტყეში ნებისმიერი რესურსის მოპოვებაზე, უნდა მოხდეს მდგრადი მოპოვების პრინციპით. ბუნებრივია, არსებობს მდგრადი მოპოვება ტყის რესურსების, მაგრამ ძალიან მნიშვნელოვანია სხვა ალტერნატიული გზების განვითარება, მათ შორის რეგიონული ტურიზმი და თუ ჩვენ ტყეებს არ გავუფრთხილდებით, ტურიზმიც ვერ განვითარდება“, განაცხადა ლევან დავითაშვილმა.