„საქართველოს ალიანსი უსაფრთხო გზებისთვის“ გამგეობის თავმჯდომარემ, ეკა ლალიაშვილმა პრემიერ-მინისტრის, მამუკა ბახტაძის მიერ გუშინ, კოჯორში წარდგენილი “მწვანე ეკონომიკის” კონცეფცია დადებითად შეაფასა. როგორც მან აღნიშნა, ხელისუფლების მხრიდან ეს დროული ნაბიჯი იყო, რომელიც ჰაერივით სჭირდება ქვეყანას.

„პრემიერის მიერ გუშინ წარდგენილი „მწვანე ეკონომიკის“ კონცეფცია და დამატებით, თბილისის მერის, კახა კალაძის რამდენიმე დღის წინ წარდგენილი სატრანსპორტო პოლიტიკა დადებითად შემიძლია შევაფასო. ეს არის ის, რაც ჰაერივით გვჭირდება დღეს ქვეყანაში. ეს პირველი პრეცედენტია, როდესაც ხელისუფლების წარმომადგენლები ამ საკითხზე ასე აქცენტირებულად საუბრობენ. ბუნებრივია, ეს ძალიან მისასალმებელია, მაგრამ ეს არის უფრო ეკოლოგიის ჭრილში, ამიტომ გარდა ამისა, საგზაო უსაფრთხოების ნაწილს კიდევ უფრო დიდი ყურადღება უნდა მიექცეს და იგივე პრიორიტეტი უნდა მიენიჭოს, როგორიც „მწვანე ეკონომიკას“. საგზაო უსაფრთხოების საჭიროების აქტუალობას უნდა გაესვას ხაზი, რომ ადამიანები აღარ დაიღუპონ გზებზე და შემცირდეს ავტოსაგზაო შემთხვევები. როგორც „მწვანე ეკონომიკაა“ საჭირო, ისევეა ეს საკითხი, რადგან ორივე ეს მიმართულება ჯანსაღ გარემოს ემსახურება“, განაცხადა ეკა ლალიაშვილმა.

საქართველოს პრემიერ-მინისტრმა, მამუკა ბახტაძემ პარასკევს კოჯორში მთავრობის წევრებს ახალი გარემოსდაცვითი კონცეფცია – „მწვანე ეკონომიკა“ გააცნო.