ზემო სვანეთის სოფლებში - ჭუბერსა და ხაიშში სპეცდანიშნულების რაზმების შეყვანას ეხმაურება პოლიტიკოსი გუბაზ სანიკიძე, რომელიც მიმართავს მამუკა ბახტაძეს და მის მთავრობას, რომ ნუ „დაუშვებენ ისეთ შეცდომებს, რომელიც დანაშაულზე უარესია“.

ტელეკომპანია „იბერიას“ ეთერიდან სანიკიძე პირობას დებს, რომ ყველანი დაირაზმებიან და სვანეთს, რომელიც „ფაქტობრივად, დღეს საქართველოს საზღვარი, დასავლეთ საზღვარია“, არ მიატოვებენ.

„მე მაინც მგონია რომ ეს არის სიბრიყვის ბრალი, გამოუცდელობის ბრალია. რაც შეეხება მამუკა ბახტაძეს, მე მას ვიცნობ დიდი ხანია და საკმაოდ მაღალი წარმოდგენა მაქვს მის შესაძლებლობებზე, ნიჭზე. სხვა საკითხია, სახელმწიფოს როგორ გაუძღვება ის. ცოტა ეჭვი მეპარება და ჯერჯერობით ავლენს გამოუცდელობას. აქედან მივმართავ, თუ გაიგებს, გაიგებს და ბევრი მინახავას ასეთი დაყრუებული. ნუ ეთამაშები ასეთ რაღაცებს კაცო! სვანეთია ეს. საქართველოს, გარდა დღევანდელი კონსტიტუციისა, ამ კონსტიტუციამდე 3 000 წელი აქვს ნაცხოვრები კონსტიტუციის გარეშე და თავის წესები და თავის მოქცევის კოდექსები გვაქვს ჩვენ. არ შეიძლება სვანეთთან ასე თამაში კაცო. მით უმეტეს ისეთ მდგომარეობაში, რა მდგომარეობაშიც ვართ. ფაქტობრივად, დღეს საქართველოს საზღვარი, დასავლეთ საზღვარი, დეფაქტო არის სვანეთი და ჭუბერი და იქიდან აფხაზებიც იყურებიან, აფხაზეთის სვანებიც იყურებიან იქიდან, კოდორელი სვანებიც. ცოტა ტვინი გაანძრიეთ, რა ჯარით შედიხართ სვანეთში კაცო, ხომ არ გაგიჟდით საერთოდ და რა გამოგივათ აქედან?! და არ მივატოვებთ იმ სვანეთს, გამორიცხულია, სუყველა დავირაზმებით... ნუ დაუშვებთ ასეთ სისულელეებს და ისეთ შეცდომებს, რომელიც დანაშაულზე უარესია, ცოტა ჭკუაზე მოდით, რაღაცა ნარკოტიკს ხომ არ ეტანებით მთელი ხეილსუფლება?!“, განაცხადა გუბაზ სანიკიძემ.