ოფიციალური პირების განცხადებით, მიუხედავად იმისა, რომ კალიფორნიაში გაჩენილ ხანძარს ათასობით მეხანძრე ებრძვის, ცეცხლი მაინც ბობოქრობს და სწრაფად ვრცელდება.

მეხანძრეების თქმით, ხანძარს ხელს მშრალი ამინდი და ცვალებადი ქარი უწყობს. ამჟამად, ხანძარს 12 000 მეხანძრე ებრძვის.

BBC-ს ცნობით, კალიფორნიაში ხანძრის რვა დიდი კერა შეინიშნება, რომლებიც 90 ოლქშია მოდებული.

ჩრდილოეთ კალიფორნიაში მდებარე შასტას ოლქში გაჩენილმა ხანძარმა ექვსი ადამიანის სიცოცხლე იმსხვერპლა, მათ შორის ორი ბავშვი და მათი ბებია.

სტქიქიამ ორი მეხანძრეც შეიწირა. მესამე მეხანძრე იოსემიტთან ახლოს მდებარე ხანძარმა იმსხვერპლა.

ხანძარი პარასკევს ღამით გაორმაგდა და მეხანძრეებს კვირისთვის მხოლოდ 5% ქონდათ ლიკვიდირებული. ხანძარი უკვე 194 კვ.კმ-ს მოედო და 500-ზე მეტი ნაგებობა გაანადგურა.

„როიტერსის“ ინფორმაციით, ხანძრის პირველი კერები ორშაბათს გაჩნდა და ხუთშაბათს უკვე დიდი ტერიტორიები მოიცვა და გაძლიერდა.

კალიფორნიის სახანძრო დეპარტამენტის თავმჯდომარემ, კენ პიმლოტმა ჟურნალისტებთან საუბრისას განაცხადა, რომ მეხანძრეები „მბრუნავ ცეცხლს ხედავდნენ, რაც ტორნადოს გავდა“.

„ქარმა ცეცხლი აიტაცა და დაატრიალა. მან მოგლიჯა ხეები, გაიტაცა ავტომობილები და მაგისტრალის ნაწილები“, დაამატა მან.

შასტას ოლქიდან 38 000 ადამიანია ევაკუირებული. კალიფორნიის გუბერნატორმა საგანგებო მდგომარეობა გამოაცხადა აღნიშნულ და კიდევ სამ ადგილას.

კალიფორნიაში ხანძრები მშრალი და ცხელი ამინდების გამო ხშირი მოვლენაა. მიუხედავად ამისა, ექსპერტები აცხადებენ, რომ ხანძრის სეზონი ასეთი სიმწვავით ბოლო 10 წლის განმავლობაში არ გახსნილა. ხანძრის გამოწვევას ხელი შეუწყო 2012-17 წლების გვალვამ, რომელმაც ბევრი ბოსტნეული გაანადგურა.

გუბერნატორმა ჯერი ბრაუნმა დეკემბერში აღნიშნა, რომ კლიმატის ცვლილების ფონზე ხანძარი „ახალ ნორმად“ იქცა და დიდი ხანძრები „შეიძლება ყოველ ან რამდენიმე წელიწადში ერთხელ მოხდეს“.