„ერთიანი ნაციონალური მოძრაობის“ ერთ-ერთმა ლიდერმა, ზაალ უდუმაშვილმა მმართველი პარტიის მიერ საპრეზიდენტო კანდიდატის შერჩევასა და არჩევნების თარიღის შესახებ ისაუბრა და აღნიშნა, რომ „ქართული ოცნებაში“ სერიოზული განხეთქილებაა.

მანვე „რუსთავი 2“-თან საუბრისას დაამატა, რომ არჩევნების გაჭიანურება ხელისუფლებისა და ბიძინა ივანიშვილის წისქვილზე ასხამს წყალს.

„არჩევნების თარიღის გაჭიანურება მხოლოდ და მხოლოდ ხელისუფლების წისქვილზე ასხამს წყალს და, კონკრეტულად, ბიძინა ივანიშვილის. ჩვენ მოვუწოდებთ საქართველოს პრეზიდენტს, რომ დროულად გამოაცხადოს არჩევნების თარიღი და არ იყოს ეს დამოკიდებული იმაზე, თავად რა გადაწყვეტილებას მიიღებს, დააყენებს თუ არა კანდიდატურას, ან რას ურჩევს მას „ქართული ოცნება“. მიეცეს ყველას საშუალება, რომ ნორმალურად ჩაერთოს წინასაარჩევნო კამპანიაში, განსაკუთრებით ოპოზიციას. ბიძინა ივანიშვილი არავისთვის არაფრის დათმობას არ გეგმავს. ვნახოთ, რა გადაწყვეტილებას მიიღებენ, დამოუკიდებელ კანდიდატს დაუჭერენ მხარს, თუ თავად დააყენებენ კანდიდატურას. ყოველ შემთხვევაში, ფაქტი ერთია - დღეს, „ქართული ოცნება“ ძალიან ცუდ მდგომარეობაშია ჩავარდნილი, რადგან დღემდე ვერ გადაწყვიტა  ეყოლება თუ არა საკუთარი კანდიდატი. ეს იმას ნიშნავს, რომ შიგნით, „ქართულ ოცნებაში“, არის სერიოზული განხეთქილება“, განაცხადა ზალიკო უდუმაშვილმა.